شه‌فه‌ق نيوز/ ده‌سه‌ى بالآى هه‌ماهه‌نگى كورده‌يل فه‌يلى، ساڵياد ئه‌نفالكردن ناوچه‌يل بادينان كردن ك وه ده‌سگيركردن سه‌دان هه‌زار كه‌س كوتاييهات و زينگ وه‌چاڵ كريان له بياوانه‌يل باشوور عراق.
ده‌سه‌ى بالآى هه‌ماهه‌نگى كورده‌يل فه‌يلى له به‌ياننامه‌يگ وت: ئى كرده‌وه‌ى دڕندانه يه‌كه‌مجار نيه دژ ملله‌ت كوردمان ئه‌نجام بگرێد، رژيم رمياێ له سه‌ره‌تاى ساڵ 1980 ده‌سكرده كردوه‌يل هاوشيوه‌يگ دژ كورده‌يل فه‌يلى وه مه‌هانه‌ى ته‌به‌عيه‌ى ئيرانى و چيه ناو ماڵه‌يليان و ده‌سكرده گرتن خيزانه‌يل كورد فه‌يلى له‌گشت ناوچه‌يل عراق و سه‌دان هه‌زار له‌ليان خسته زيندان دوياى زه‌فتكردن ماڵ و موڵكه‌يليان و فريه‌يگ له خيزانه‌يليش دويره‌و خست ئه‌را بان مه‌رزه‌يل عراق وئيران بيجگه ده‌سوه‌سه‌رگرتن هه‌زاران له رووڵه‌يليان ك دوياخريش وه‌شيوه‌ێ له‌ناوبردن وه‌جه‌م گشيان كوشت.
به‌ياننامه‌گه هه‌ميش وت: ئيمه له‌وه‌ختيگ ساڵياد تاوان ئه‌نفال ئه‌كه‌يم ك زياتر له 180 هه‌زار مه‌ده‌نى له‌تى بوينه قوربانى و داوا له حكومه‌ت عراقى ئه‌كه‌يم بگه‌ردێده شوون روفاته‌يليان و قه‌ره‌بووكردن خيزانه‌يليان وه ماددى و مه‌عنه‌وى و دادگاييكردن هه‌ركه‌سيگ ده‌س له‌و تاوان دڕنده داشتگه تا بدێده په‌نديگ ئه‌را كه‌سه‌يل تر.