فه‌يلى له به‌ياننامه‌يگ وت: كوردستان له ديد مه‌ردم جه‌هانه‌و وه ئه‌وه ناسرياگه ك مه‌ردمه‌گه‌ى خاوه‌ن خه‌بات و قوربانى بويه دژ زوڵم و ماوايگ بويه ئه‌را له‌خوه‌يگرتن ئۆپۆزسيۆن و زوڵمليكرياگه‌يل و مليۆنه‌ها كووچبه‌ر وه‌گشت تايفه‌و پيكهاته‌يليگ و خاوه‌ن كيشه‌يگ پيرووز نه‌ته‌وايه‌تيه‌و شوونيگه ئه‌را ژيان ئاشتيانه‌ى ناونى ئايينه‌يل و نه‌ته‌وه‌يل و روى وه‌ڕوى بوينه‌وه‌ى ترۆر.
فه‌يلى وت: ئمڕوو ترس فريه‌يگ ديرێم ك ئى ره‌سم چه‌رمگ بيگه‌رده تويش شيويان و مه‌ترسى باێد ك كورد دويره له‌لى و كاردانه‌وه‌ى كاريگه‌رى داشتوود له‌بان ملله‌ت كورد، ك هه‌ر وه‌و خاتريشه فه‌يلى داوا له مه‌سعود بارزانى سه‌رۆك هه‌رێم كرد هه‌ڵه‌په‌ڵه ده‌خاڵه‌ت بكا و رينمايى بيه‌ێده ده‌سڵاته‌يل ئاسايشى و دادوه‌رى و سه‌نديكاى رووژنامه‌نويسه‌يل ڕى وشوون ئه‌را هووكاره‌يل ره‌سانن دابنه‌ن و جاده‌ى كوردستانى ئارامه‌و بكريه‌ێد و ره‌فتار خاس ئه‌نجام بدريه‌ێد له‌وه‌رانوه‌ر كرده‌وه‌يل مناڵانه‌و مامۆستاى مزگفته‌يليش نه‌خش خوه‌يان له‌ى باوه‌ته‌و نيشان بيه‌ن و ئامووگارى مه‌ردم بكه‌ن.
فه‌يلى باس له‌وه‌يش كرد و وت: من دڵنيام له‌وه‌گ ملله‌ت كوردستان و سه‌ركرده‌گه‌ى نه‌خشه‌ڕييگ دينه‌سه‌و له‌ڕى قوربانيداين ئه‌را ئاينده‌يگ پر ئاسايش و ئوميده‌وارم كوردستان نه‌كه‌فێده ليژاييگ كاريگه‌رى خراو داشتوود له‌بان ژيان ئاشتيانه‌و هاووڵاتى له‌تى بدێده قوربانى نه‌ك كه‌سيگ تر.
جى باسه، فه‌يلى هه‌ميش وت: له بوونه‌يل فريه‌يگ داوا له ئاقڵمه‌نده‌يل سنى و شيعه كرديمه ده‌نگ ئه‌قڵ زاڵ بكه‌ن ك ئمڕوو هه‌وه‌جه‌ى فريه‌يگ وه‌پى ديريم و هه‌وڵ بيه‌ن ره‌فتار ئه‌و كه‌سه‌يله راسه‌و بكه‌ن ك خراوى ده‌رهه‌ق نه‌ته‌وه‌و مه‌زه‌و ئه‌كه‌ن، چوينكه مه‌ترسى ئى كاره‌يله فيشتره له مه‌ترسى داعش و عراقيه‌يل ئه‌خاده وه‌رده‌م تون وتيژى و پاڵيان ئه‌نه‌ێد وه‌ره‌و چاره‌نويسيگ ناديار.