شەفەق نیوز/ فڕۆکەیگ بێفڕۆکەوان تورکیا، ئمڕوو سێشەممە، کامپیگ ئەرا پەنابەرەیل کورد تورکیا لە قەزای مەخموور کردە ئامانج.   

سەرچەوەیگ ئەمنی ئەرا ئاژانس شەفەق نیوز وت: فڕۆکەگە ماڵیگ لەناو کامپەگە کردە ئامانج.   وتیش: تا ئیسە ئامار هویردیگ لە زەرەدەیل ئەو گورزە لەوردەس نییە. 

ئەو خەوەرەیلە ک رەسینە ئاژانس شەفەق نیوز باس کەفتن قوربانیەیلیگ لەناو کەسەیل ناو ئەو کامپە کردن، ک هەر ماوەی جاریگ کەفێدە وەر ئیجویر پەلاماریگ.    

ئەو پەلامارە لەبان مەخموور، وەگەرد سەردان شاندیگ ئەمنی پایەبەرز لە بەغداد ئەرا قەزای مەخموور هات.  

دویای ئەوە، دژەتیرۆر هەرێم کوردستان، لە دیاریکردنیگ رەسیە ئاژانس شەفەق نیوز وت: ئەو پەلامار تورکیا، بارەگایگ پەکەکە لە مەخموور کردیەسە ئامانج.  

کامپەگە سەدان لە خیزانەیل کورد هاناوی، ک یە ساڵەیل فرەیگە لە تورکیا ئاوارە بوینە، وئەنقەرە ئویشێد: پەکەکە ئەو کامپە کردیەسە شوین راهێنان جەنگاوەرەیلی، و لەورەو پەلاماریان ئەرا ناو تورکیا جیوەجی کەێد.