شه‌فه‌ق نيوز/ عادل عه‌بدولمه‌هدى سه‌رۆك وه‌زيره‌يل عراق له ماوه‌ى ئى هه‌فته سه‌ردان هه‌ولێر پايته‌خت هه‌رێم كوردستان ئه‌كاو چه‌وێ ئه‌كه‌فێده سه‌ركردايه‌تيه‌يل سياسى له هه‌رێم كوردستان.
وه‌گووره‌ى زانياريه‌يليگ له‌لايه‌ن سه‌رچه‌وه‌يل ره‌سانن كورديه‌وه، ئه‌وه ده‌ركه‌فت ك سه‌ردانه‌گه‌ى عه‌بدولمه‌هدى له 13 يا 14ى ئى مانگه ئه‌نجام ئه‌گرێد ك وه‌پله‌ى سه‌ره‌كى ئه‌را پيرووزباييه له نێچيروان بارزانى سه‌رۆك هه‌رێمه ك پۆسته‌گه له مه‌راسيميگ قه‌سه‌مخواردن ياسايى وه‌رگرت وه ئاماده‌بوين شماره‌ى فريه‌يگ له كه‌سايه‌تيه‌يل سياسى و حزبى كوردستانى و عراقى و بيگانه.
هه‌ر وه‌گووره‌ى زانياريه‌يل ئه‌وه‌يش ده‌ركه‌فت ك عه‌بدولمه‌هدى له سه‌ردانه‌گه‌ى ديداره‌يليگ وه‌ل سه‌ركردايه‌تيه‌يل سياسى له هه‌رێم كوردستان ئه‌نجام ئه‌يه‌ێد ئه‌را گفتگووكردن له‌باره‌ى په‌يوه‌نديه‌يل ناونى هه‌ولێر و به‌غدا.