کەشناسی لە بەیانامەیگ رەسیە ئاژانس شەفەق نیوز وت، بارستە وای سەردیگ روی لە ناوچەگە کەێد و وەگەرد هاتن شەپوول وەفر و واران، دیاریکرد ئمڕوو وەگشتی ئاسمان ئەورە وەگەرد نمە واران لە فرەیگ لە ناوچەیل هەرێم بڕیگ جار ئاست واران وارین ئاڵشتبوود ئەرا واران مامناوەند.

ئەوەیش خسە روی لە ناوچە کویەیلە وەفر وارێد، هاتی لە دیر وەخت شەو وەفریگ تیکڵا وە واران لە سەنتەر شارەیل سلێمانی و دهۆک بوارێد، وەگەرد خوەڵوارین لە کەرکوک و گەرمیان ک تیکڵاس وەگەرد واران و پلەی گەرما چوار تا پەنج پلە داوەزین وە خوەی دوینێد.

لەباوەت کەشوهەوای سوو چوارشەممە راگەیان، ئاسمان وە گشتی ئەورە وەگەرد پرزە واران له فرەیگ لە ناوچەیل هەرێم و وەفر وارین لە ناوچە کویەیلە وەردەوام بوود، لە وەخت شەوەکی شەفەق هاتێ وەفر لە سەنتەر شارەیل دهۆک سلێمانی بوارێد.

بەرزترین پلەیل گەرما مەزەنە کریاگ  پلەی سیلیزی:

هەولێر: 9 پلەى سیلیزى

سلێمانی: 6 پلەى سیلیزى

دهۆک: 5 پلەى سیلیزى

کەرکوک: 12 پلەى سیلیزى

هەڵەبجە: 8 پلەى سیلیزى

زاخۆ: 6 پلەى سیلیزى

سۆران: 5 پلەى سیلیزى

گەرمیان: 13 پلەى سیلیزى.