شەفەق نیوز/ شارەزای مژار کەشناسی، شاڵاو هیدایەت، ئمڕوو شەممە، راگەیان تا رووژ سێشەممەی بانان ئەگەرەیل وەرفرەلویل وارین وەردەوامە، پلەی گەرمیش چوار تا شەش پلەی ترەک داوەزێد.

شاڵاو دیاریکرد "ئێ شەپوول وەفر وارینە کە ئیرنگە بەشیگ لە ناوچەیل هەرێم گردیەسەو و بڕ وەفر  0.1سم تا 15سم بوود، هەر لە ناوچە کویەیلە تا ناوچە دەشتایەیل فرەیگ گرێدەو، فرەترین رێژە ها ناوچە کویەیلە و دویایی نیمپەکویەیلە و کەمترین رێژەیش ها لە دەشتایەیل خورئاوا".

وتیش "پلەی گەرمی سوو یەکشەممە و رووژەیل ترەک زیاتر داوەزێد وە رێژەی چوار تا شەش پلەی ترەک، و رووژەیل  یەکشەممە، دووشەممە و سێشەممە، لوتکەی سەرماگەس و تا رووژەیل جومعە و  سەرەتای هەفتە، هاتێ سایەخە و بەستن بوود، وەجویریگ، یەکشەممە، دووشەممە و سێشەممە لە شەو و شەوەکیان، لە گشت  ناوچەیل هاتی یەخداین بوود،  تا جومعە و سەرەتای هەفتە لە فرەیگ ناوچەیل مینێد، وە کاریگەریی لاواز و کەمتر.

دیاریکرد، ئێ شەپوو وەفر وارینە و زوقومە مێژوویی و بی وینەس.