شه‌فه‌ق نيوز/ سه‌رچه‌وه‌يگ پزيشكى و يه‌كيگيش ناوچه‌يى ئاشكراى ئه‌وه كردن ك شماره‌ى قوربانيه‌يل په‌لاماره‌گه‌ى ريكخرياگ تيرۆريستى داعش ئه‌را بان ناوچه‌ى گه‌رميان به‌رزه‌و بويه ئه‌را 5 كه‌س ك چوار له‌ليان له هيزه‌يل ئاسايش و ئه‌واكه‌يش مه‌ده‌نيه.
ئه‌و سه‌رچه‌وه‌يله ئه‌را شه‌فه‌ق نيوز وتن: له‌و په‌لاماره 8 كه‌س له كارمه‌نده‌يل ئاسايش و مه‌ردم مه‌ده‌نى زه‌خمدار كردگه.
هه‌مان سه‌رچه‌وه‌يل يه‌يش ده‌رخستن ك يه‌كيگ له‌و كارمه‌نده‌يل ئاسايشه ك كوشياگه زويتر ريكخرياگ ئه‌لقاعيده باوگى كوشتوێد و ريكخرياگ داعشيش برايگى كوشتوێد دوياى ئه‌وه‌گ داعش له‌ساڵ 2014 سێكوى خاكه‌يل عراق داگير كرد.
جى باسه، هيزيگ له ئاسايش روێ وه‌ڕوێ ئه‌و په‌لاماره بويه ك له‌لايه‌ن ريكخرياگ تيرۆريستى داعشه‌و ئه‌نجام دريا ئه‌را بان هيزيگ كورد له ئاوايى "كوڵه‌جۆ" له گه‌رميان.