شەفەق نیوز/ لیوا روکن بەختیار محمد سکرتێر گشتی وەزارەت پێشمەرگە، ئمڕوو پەنجشەممە، ئاشکرای باوەت یاداشت لەیەکڕەسینەوە لەناوبەین وەزارەتەگەی و وەزارەت وەرگری ئەمریکا کرد، ئەوەیش وە ئامادەبوین سەرۆک هەرێم کوردستان و سەرۆک حکومەت هەرێم کوردستان و وەرپرس و پەرلەمانتارەیلیگ و فەرماندەیلیگ سەربازی لە هەردوگ لایەنەگە.
سکرتێر گشتی وەزارەت پێشمەرگە لە کۆنگرەیگ رووژنامەوانی لە سلێمانی و ئاژانس شەفەق نیوز ئامادەی بوی وت: ئەو یاداشتە ک دویەکە ناوبەین وەزارەت پیشمەرگە و وەزارەت وەرگری ئەمریکا واژوو کریا، یاداشتیگ یا رێککەفتن نوویگ نەوی، باوجی نووەکردن ئەو یاداشت کۆنە بوی ک لە ساڵ ٢٠١٦ واژوو کریا، و دیاری کرد ک ئەرا هاوکاری و هەماهەنگی هاوبەش ناوبەین هیزەیل هاوپەیمان ناودەوڵەتی وە سەرپەرشتی ئەمریکا و هیزەیل عراق و پیشمەرگە بوی، و وەئاگاداری حکومەت عراق کریایە.
دیاری کرد ک یاداشتەگە باس پابەندی ناوبەین هەردوگ لایەنەگە کەێد ئەرا رەسین وە ئاست بەرزیگ لە هەماهەنگی ناوبەینیان، وبەشیگی پەیوەندی وە لایەن ئەمریکی دیرێد ک باس دابینکردن چەک و عەتاد و پاڵپشتیکردن دارایی ئەرا هیزەیل پیشمەرگە کەێد، وەگەرد پیشکەشکردن ئەزموون سەربازی وە پیشمەرگە.
لە باوەت پابەندیەیل وەزارەت پیشمەرگە، لیوا محمد ئویشێد: ئەوەیش باس ڕێکخستن هیزەیل پیشمەرگە و پابەندی وە هەماهەنگی ناوبەین گشت لاینەیل هاوپەیمان ناودەوڵەتی کەێد، هەمیش پابەندی وە راهینان خوازیاگ و ڕێکخستن کارەیل ئیداری ئەرا گشت هیزەیل پیشمەرگە.
وتیش: جیاوازی ناوبەین یاداشت کۆنەگە ونووەگە تەنیا ها ماوەی واژووکردن یاداشتەگە، ک وەرجەیە ئەرا یەک ساڵ بوی، و ئیرنگە ماوەگەی زیاترەو بوی.
سکرتێر گشتی وەزارەت پێشمەرگە وتیش: رێککەفتنەگە پابەند گشت هیزەیل عراقی و پیشمەرگەیش و هیزەیل فیدراڵی وە هەماهەنگی و هاوکاری هاوبەش لەناو خوەیان لەیەکلا کەێد، و لەلاییگتر وەگەرد هیزەیل هاوپەیمان ناودەوڵەتی.
لیوا بەختیار محمد هەمیش دیاری کرد ک یاداشتەگە هەمیش باس کارکردن ئەرا هشکەوکردن سەرچەوەیل تیرۆر کەێد، و تایبەت سەرچەوەیل داراییان، وتیش؛ دەزگایل هەواڵگری هیزەیل پیشمەرگە لە هەرێم کوردستان لەناو نووڕینیگ هاوبەش لەناو هیزەیل عراق و هاوپەیمان ناودەوڵەتی کار کەن، باوجی ئیمە نووڕینیگ گشتی خوازیمن، ک نووڕین هاوپەیمان ناودەوڵەتی وەشیوەی گشتی بگرێدەو.
لەباوەت هەماهەنگی ناوبەین هیزەیل فیدراڵی و هیزەیل پیشمەرگە لە ناوچە دابڕیایەیل، لیوا روکن بەختیار دووپات کرد ک یاداشتەگە باس پابەندی هیزەیل عراقی وە هەماهەنگی لە وەڕیەوبەردن باوەت ئەمنی لە ناوچەیل دابڕیای و گشت ناوچەیل عراق، وتیش؛ وەزارەت پیشمەرگە گشت پابەندیەیلی وە دابینکردن دوو لیوای هاوبەش ئەرا وەڕیەوبردن باوەت ئەمنی لە ناوچەیل دابڕیای تەواو کرد، و ئەوەگ مەنیە خوەی تەرخانکردن سپۆنسەر داراییە ئەرا ئەو دوو لیوا لەلایەن وەزارەت دارایی فیدراڵ.