شەفەق نیوز/ نێچیرڤان بارزانی، سەرۆک هەرێم کوردستان ئمڕوو دووشەممە، دووپات کرد کە مقیەتیکردن ماف گشت پێکهاتەیل تەنیا دروشمیگ نییە کە بەرزی کەیمنەو، بەڵکم پرەنسیپ و چەمکیگ پتەویە کە باوەڕ وەپی دیریمن.
لە وتار دەسکردن وە کۆنفرانس ئیدارەی ئەوقاف کڵێسا لە هەولێر، وە ئامادەبوین ئاژانس شەفەق نیوز، بارزانی راگەیان کە"بەشداریکردن ئمڕوومان لەی شوینە پاڵپشتیمان ئەرا گشت پێکهاتەیل هەرێم کوردستان نشان دەێد، و وەتایبەتیش ئەرا هاووڵاتییە مەسیحییەیلمان، کە بەشیگ دانەوڕیاگن لە شیوەی ئی کۆمەڵگا و لە میژوو هاوبەشی کوردستان".
وتیش: "کوردستان ماڵیگە ئەرا گشتی، وەبی هیچ جیاوازییگ، گشتمان لەژیر ئاسمانەگەی و لەبان زەویەگەی گردەو بویمن، ئیمە ماف و ئەرک دیریمن، و ئەرک ئیمەس مقیتەییان بکەیمن، ئی خاکە هەزاران ساڵە، جویر خاک وەیەکەوژیان ئاشتیانە، قبوڵکردن نووڕینەیل ترەک، و بەشداریکردن دادپەروەرانە لە ماف و ئەرکەیل ناسیاس".
وتیش: "مقیەتیکردن ماف پێکهاتەیلمان تەنیا دروشمیگ نییە کە بەرزیەو کەیمن، بەڵکم بنەما و چەمکیگ ریشەکوتیای قویلە کە باوەڕ وەپی دیریمن، هەرلیوا دووپات لە گرنگی ئەوە کەیمن کە گشتمان وە ئاشتی و هاوبەشی بژیمن".
بارزانی لە درویژەی قسەیلی وتیش "لە سەرەتای دامەزرانن پەرلەمان کوردستانەو، دووپات لەبان دەسەوەرکردن بەشداری و نوێنەرایەتیکردن گشت پێکهاتەیل لە ژیان سیاسی هەرێم کوردستان کردیمنە، لە ماوەی ساڵەیل گوزەشتە هەرێم کوردستان پابەندبوین خوەی وەو پرەنسیپە چەسپانیە، وەیەکەوژیان ئاشتیانەیش یەکیگ بویە لە مدووەیل هازداری و ئارامی هەرێم کوردستان".
دیاری کرد کە "پرس وەڕێوەبردن وەقفەیل کڵێسا کە لەی کۆنفرانسە باسی کریەێد، گرنگییگ سەرەکی دیرێد، وەقف مەسیحی تەنیا خاوەندارێتی ماددی نییە، بەڵکم بەشیگ دانەوڕیاگە لە میراتی دەوڵەمەنی ئایینی و کولتووری مەسیحییەیل لەی ناوچەیە، و گەرەنتی رۆڵ وەردەوامیان لە کوردستان و عراق".
وتیش: "لەی رویەو پاڵپشتی تەواو خوەمان ئەرا زویترکردن یاسایگ ئەرا رێکخستن وەڕێوەبردن ئەوقافە مەسیحییەیل دووپات کەیمنەو، کە وەرد یاسای عراق بگونجێد، و دڵنیایی لە مقیەتیکردن ئەو موڵکەیلە لە هەر دەسدرویژییگ یا سەرپێچییگ، ئی یاسا تەنیا چوارچیوەیگ یاسایی نیەوود، بەڵکم پەیامیگ ئاشکرا بوود کە ماف مەسیحییەیل مقیەتی کریانە، بوینیان لە ناو ئەوقافە مەسیحییەیل مسۆگەر بکرێد، و میراتەگەیان و موڵک و ماڵ خوەیان وەباوگ و باپیریان مقیتەیی کریاوێد". وتیش: "مقیەتیکردن ئەوقافەیل تەنیا وە مقیەتیکردن ماڵ و موڵک سنووردار نییە، بەڵکم دابینکردن پاڵپشتیە کە نەدارەیل و کراکارەیل کڵێسایش گرێدەو، و ئاسانکاری ئەرا چالاکییە ئایینی و کۆمەڵایەتییەیل، یەیش هیلێد کڵێسا بتوانێد پەرە وەو وەقفەیلە بەێد لەڕی ئیدارەیگ سەروەخوەیی کە ڕاستەوخۆ وەپی بیریەێد". ڕوونیشیکردەوە، "پێکهاتەیل هەرێم کوردستان میوان نیین، بەڵکم بەشیک دانەوڕیاگن و دامەزریانە لەی خاکە، ئیمە ئەرا گشت لاییگ دووپات کەیمن کە هەرێم کوردستان، وە درویژایی میژوو، گشت لایگ لە باوەش گردگە، و هەمیشە فەزای ئازادی و وەیەکەوژیان ئاشتیانە بویە".
سەرۆک هەرێم کوردستان لە وتیش: ئی بنەمایلە تەنیا لە چوارچیوەیگ یاسایی و ئاشکرا وەدی نیارن کە مافەیل گەرەنتی بکەێد و مقیەتی هەمەجویریی بکەێد. ئومیداریمن دەرئەنجامەیل ئی کۆنفرانسە دەسمیەتیدەر بوون ئەرا خاسترکردن رەوش هاووڵاتیەیل مەسیحی لە گشت بواریگ و بەرزکردن بەشداری چالاکانەیان لە ژیان گشتی.
بارزانی "سوپاس و پێزانین قویل خوەی وە زانکۆی کاسۆلیکی لە هەولێر و قەشە بەشار وەردە و گشت ڕێکخەرەیل و کەسە رێزدارەیل پیشکەش کرد کە بەشداری لە ئامادەکردن و ڕێکخستن ئی کۆنفرانسە کردنە".