شەفەق نیوز/ سەرچەوەیلیگ ئاگادار، ئمڕوو یەکشەممە، خەوەردان کە شاندیگ لە حکومەت هەرێم کوردستان، رەسیە بەغداد پایتەخت، ئەرا دویاترین کارەیل لە پرس دووارە هەناردەکردن نەفت لەڕی کڕ جیهان تورکی.

 یەکیگ لەو سەرچەوەیلە ئەرا ئاژانس شەفەق نیوز وت: شاندیگ لە وەزارەت وزە و سامانەیل سروشتی لە حکومەت هەرێم کوردستان لەپسا گردەوبوین وەرد وەرپرسەیل ئەنجام دەێد لە بارەگای وەزارەت نەفت فیدڕاڵی، ئەرا یەکلاییکردن جیماگەیل دووارە هەناردەکردن نەفت لە هەرێم کوردستان، و باوەتەیلیگ ترەک پەیوەندی وە کار کۆمپانیایل دیرن.

سەرچەوەیگ ترەک ئەرا ئاژانسەگەمان وت: بڕیار بوی رووژ سێشەممەی ئایندە ئی گردەوبوینە بوود، وەلێ کارەیلیگ لەی پرسە هیشتن مەوقەگەی باێدە نواتر، وەبی باسکردن هویردەکاریەیل.

 وەزارەت نەفت عراق، دویەکە شەممە، داوا لە کۆمپانیایل نەفت جیهانی لە ژیر چەتر  "ئەبيكور" کرد کە گریەبەسی وەرد حکومەت هەرێم کوردستان دیڕن، وەگەرد وەزارەت سامانەیل سروشتی لە هەرێم کوردستان، لە رووژ سێشەممە 4 ئادار 2025 لە بەغداد ئامادەی گردەوبوین بوون.

 رووژ جمعەی گوزەشتە، هەشت کۆمپانیای ناودەوڵەتی لە هەرێم کوردستان کار کەن، راگەیانن کە هەناردەی نەفت لەڕی بەندەر جیهان تورکی دووارە نیکەن، هەرچەن بەغدا راگەیان کە هەناردەکردن نزیکە.

وەرجەیە، حەیان عەبدولغەنی جیگر سەرۆک وەزیرەیل ئەرا کاروبار وزە، دووارە دەسکردن وە هەناردەی نەفت هەرێم کوردستان لەڕی بەندەر جیهان تورکی لەماوەی ساعەتەیل ئایندە راگەیان.