زەهرا ئەلبجاری، سەرۆک دەسەی گواستنەوە و رەسانن لە پەرلەمان عراق لە کۆنگرەیگ رووژنامەوانی وە ئامادەبوین ئاژانس شەفەق نیوز، لە سلێمانی وت: “دەسەگە گشت زانیارییەیل تایبەت وە فڕۆکەخانەی سلێمانی لە ئیدارەی فڕۆکەخانەو وەرگردگە، و ئەوەیش زانیاس کە فڕۆکەخانەی سلێمانی دویەم فڕۆکەخانەس لە ئاست عراق لەروی مووڵەتگردن، و لەژیر دەسەڵات فڕۆکەوانی مەدەنی  کار کەێد”.

وتیش "لایەن تورکیا دەسپیچگ خوەی دیرێد ئەرا ئەو گەمارۆیە کە لەبان فڕۆکەخانەی سلێمانی چەسپانیە، بەڵام دویای گلەوخواردنمان ئەرا بەغدا وەرد دەسەڵات فڕۆکەوانی و دەسەی ئاسایش و وەرگری و دەسەی پەیوەندییەیل دەیشت گردوە بویمن ئەرا دەسکردن وە دانوسەنین وەرد تورکیا". 

ئەلبجاری وتیش: "دەسەگە هەر دەسدرویژییگ رەت کەێد لەبان هەر بەشیگ یا هەر دامەزراوەیگ عراقی لە هەر بەشیگ وڵات و لە هەر وڵاتیگەو و وە دڵنیاییەو پەرلەمان عراق هەڵوێستیگ ئاشکرا بوود".

هەرلیوا،  وەڕێوەبەر گشتی فڕۆکەخانەی ناودەوڵەتی سلێمانی، هندرێن هیو، لە ناز کۆنگرە رووژنامەوانیەگە رادەی زیانە ماددییەیل فڕۆکەخانەگە ئاشکرا کرد لە ئەنجام قەیەغەکردن فڕۆکەوانی تورکیا، و دووپات کرد کە “زیانەگە ماددی بویە و 35% هامشوو فڕۆکەییە لە سلێمانی، و زیان ماددی وە ئیمە رەسیەسە نزیکەی 10 ملیۆن دۆلار”.

دەسەڵات فڕۆکەوانی مەدەنی تورکیا لە 4 نیسانی 2023ەو کاروانەیل ئەرا فڕۆکەخانەی ناودەوڵەتی سلێمانی وسانیە و ماوەی وسیان کاروانەیل ئەرا فڕۆکەخانەی ناودەوڵەتی سلێمانی تا 7/ 1/ 2025 درویژەو کرد، ئەوەیش وە دەسپیچگ هوکار "ئەمنی". دەڵێن.