شەفەق نیوز- هەولێر
فەرمانگەی راگەیانن و زانیاری لە حکومەت هەرێم کوردستان، ئمڕوو سێشەممە، خەوەردا وە چگن شاندیگ دانوسەنکار باڵا لە حکومەت هەرێم کوردستان وەرەو بەغدای پایتەخت فیدراڵی لە سوو چوارشەممە.
فەرمانگەگە لە بەیاننامەیگ رەسیەسە ئاژانس شەفەق نیوز، وت کە شاندەگە وەردەوام بوود لە دانوسەنین وەرد حکومەت فیدراڵی لەباوەت پابەندبۊنەیل و ماف و شایستە داراییەیل هەرێم کوردستان لە ناو بودجەی گشتی فیدراڵی ئەرا ساڵ 2027، وە دیاریکردن ئەوەگ شاندەگە سەرۆک دیوان ئەنجومەن وەزیرەیل، و سکرتێر ئەنجومەن وەزیرەیل، و سەرۆک فەرمانگەی هەماهەنگی و وەدۊاکەفتن، و بریکار وەزارەت سامانە سروشتییەیل، و وەڕێوەبەرەیل گشتی ئەرا بودجە و ژمێریاری لە وەزارەت دارایی و ئابووری لە هەرێم کوردستان لەخوەی گرێد، لەشان نۊنەریگ لە وەزارەت کاروبار پێشمەرگە.
دیاری کرد کە شاندەگە، وە هەماهەنگی وەرد نۊنەرایەتی کوردستان لەلای حکومەت فیدراڵی، لە سەردانەگە گردەوبوینەیل فەرمی وەرد وەزارەت دارایی فیدراڵی بەسێد، وە ئامانج دیالۆگ و رەسین ئەرا "لەیەکفامستن هاوبەش و دادپەروەرانە" لەباوەت پابەندبۊنە دارایی و نەوتییەیل ئەرا هەرێم کوردستان، لەشان ماف و شایستە داراییەیلی لە بودجەی 2027.
فەرمانگەگە، وەپەی بەیاننامەگە، وتیش کە شاند هەرێم کوردستان دووپات کەێد کە حکومەت هەرێم کوردستان پابەندبۊنە دارایی و نەفتییەیلی لە وەرانوەر حکومەت فیدراڵی جیوەجی کردگە، و وەردەوام بوود لە جیوەجیکردن ئی پابەندبۊنەیلە ماوەی ساڵ 2027، وە دانان ئەوەگ ئەوە هیچ دەسپیچگیگ یا مدوویگ نیەیلێد ئەرا دۊاخستن یا وسانن یا کەمەوکردن مافەیل هەرێم و شایستە داراییەیلی.
وەپەی بەیاننامەگە، گردەوبوینەیل باس لە گشت ماف و شایستە داراییەیل هەرێم کەن، کە مووچە و شایستەیل فەرمانبەرەیل، و هیزەیل پێشمەرگە، و هیزەیل ئاسایش ناوخۆیی، و خانەنشینەیل، و زیندانییە سیاسییەیل، و کەسوکار شەهیدەیل، و سوودمەنەیل لە توڕ پاراستن کۆمەڵایەتی لەخوەی گرێد، لەشان شایستەیل هەرێم کوردستان لە ناو خشتەیل میلاکات و پلەیل فەرمانبەری، و خەرجییەیل وەکارخستن، و پرۆژەیل بەرهەمهاوردن، و خەرجییەیل سەروەری، و گشت شایستە داراییە دیاریکریاگەیل ئەرا هەرێم وەپەی دەستوور و یاسا پەیوەندیدارەیل.
هەمیش شاندەگە، وەپەی بەیاننامەگە، فتراق خەێدە بان چەسپانن و پاراستن ماف و شایستە داراییەیل هەرێم، و لە وەرینیشیان مووچە و شایستەیل فەرمانبەرەیل، وە شیوەیگ رووشن و یاسایی لەناو یاسای بودجەی گشتی فیدراڵی ئەرا ساڵ 2027، وە شیوەیگ کە مسۆگەر بکەێد، وەپەی فەرمانگەگە، یەکسانی لە ناوەین هاووڵاتییەیل و فەرمانبەرەیل هەرێم کوردستان و هاوتاگانیان لە ناوچەیل ترەک عراق لەڕۊ ماف و شایستە داراییەیل، وەپەی ئەوەگ دادگای باڵای فیدراڵی پەسەنی کردگە.
بەیاننامەگە وتیش کە شاندەگە هەمیش زوور کەێدە بان هەوەجەی دۊرخستن مووچە و شایستە داراییە بنەڕەتییەیل لە پێوەر خەرجی راسگانی و هەر کۆت و بەنیگ ترەک کە شایەت بوودە مدوو دۊاخستن یا وسانن یا کەمەوکردن ئی شایستەیلە، و دانان میکانیزمیگ ئاشکرا و جیگیر لە ناو بودجەی فیدراڵی ئەرا دابینکردن و کلکردن ماف و شایستە داراییەیل ئەرا هەرێم کوردستان.