شەفەق نیوز/ هیڤدار ئەحمەد ئەندام پەرلەمان هەرێم کوردستان، ئمڕوو پەنجشەممە، هووشداریدا لە ئەو رەوشە ک قەزای زاخۆ لەلی زیان دوینێد، دویای زیایبوین ژمارەی تووشهاتنەگان وە ڤایڕۆس کۆڕۆنا، و چووڵبوین خەسەخانەگان لە دەرمان و هەمیش کەمی ئۆکسجین لەناویان، وئاشکراکرد ک شۆفێرەیلیگ لەدەوڵەت تورکیا تیەنە ناو هەرێم و تیکڵای مەردم بوون هەرچەن تووش پەتاگە هاتنە.
ئەحمەد لە ناو دانیشتن پەرلەمان کوردستان ئمڕوو وت: داوا لە پەرلەمان کەم رزگار خەڵک زاخۆ بکەن چوونکە دۆخەگە لەورا فرە مەترسیدارە لەوەر بەرزەوبوین تووشهاتنەگان وە ڤایڕۆس کۆرۆنا، ودەرمانیش لە خەسەخانەگان زاخۆ نیە، و قەزاگە لە کەمی ئۆکسجین زیان دوینێد، ونەمەنی دەرمان وەرگری لە دەرمانخانە حکومەتیەگان.
وتیش: خەڵکەگە نێتوێنن لە دەرمانخانە تایبەتەگان دەرمان بسینن لەوەر رەوش ئابووری سەختیان، و داوا لەحکومەت هەرێم کرد بوودجەیگ تایبەت ئەرا زاخۆ تەرخان بکەێد، ئەرا رزگارکردنی لەی دۆخیە.
ئەحمەد هەمیش وت: ئەو شۆفێرەیلە لە تورکیاو تیەنە ناو هەرێم، و چەن رووژیگ لەناو شارەگان گەردن هەرچەن خوەیان تووش ڤایڕۆس کۆرۆنا هاتنە، وهەڵسوکەفت وەگەرد خەڵکەگە کەن و بوونە هووکار لە گواستنەوەی پەتاگە، ئەراوە خەڵک زاخۆ فرەترین زەرەدمەنن لەی رەوشە لەوەر مەرز ئیبڕاهیم خەلیل.