شەفەق نيوز- هەولێر 

سەرچەوەیگ لە وەزارەت دارایی و ئابووری لە حکومەت هەرێم کوردستان، ئمڕوو شەممە، دەسکردن وە بەشەوکردن مووچەی فەرمانبەرەیل هەرێم کوردستان ئەرا مانگ ئایار گوزەشتە راگەیان، کە لە رووژ یەکشەممەو دەسوەپی کەێد.

ئەو سەرچەوە کە داوا کرد ناوی ئاشکرا نەکریەێد، ئەرا ئاژانس شەفەق نیوز وت: وەزارەت دارایی و ئابووری لە حکومەت هەرێم کوردستان، ئەوەسا سوو یەکشەممە، 120 مليار دينار، جویر داهات ناوخوەیی خەێدە هەشمار وەزارەت دارایی فیدراڵی لەڕی لقەیل بانک ناوەندی عراق لە هەولێر.

 وتیش: وەزارەت دارایی فیدڕاڵی رووژ دووشەممەی ئایندە 960 مليار دينار خەێدە هەشمار وەزارەت دارایی و ئابووری لە حکومەت هەرێم کوردستان، جویر شایستەی مووچەیل مانگ ئایار، دیاری کرد کە وەزارەتەگە لە رووژ سێشەممەو تا رووژ پەنجشەممە مووچە بەشەو کەێد.

  سەرچەوەگە وتیش: وەزارەت دارایی و ئابووری رووژ یەکشەممە دویای ئی یەکشەممە، بڕە قویلیگ ترەک بایی 120 مليار دينار خەێدە هەشمار وەزارەت دارایی فیدراڵی، جویر داهات ناوخوەیی، وەمەرجیگ دارایی فیدڕاڵی 960 مليار دينار ئەرا مووچەیل مانگ حوزەیران کلبکەێد، تا لە سێشەممەو تا پەنجشەممەی خود هەفتەگە مووچەیل هەرێم کوردستان بەشەو بکەێد.

لەباوەت مووچەی مانگ تەمووز، دیاری کرد کە وەزارەت دارایی و ئابووری لە حکومەت هەرێم کوردستان، ئەوەسا مووچەی دوو چین لە فەرمانبەرەیل وەرجە ناوڕاس مانگ ئاب دەێد، وتیش: وەزارەتەگە چوودە سڵاکاری وەرم وەزارەت دارایی فیدراڵی ئەرا رەسین وە رێککەفتن نوویگ لە میکانیزم کلکردن مووچەیا لە بەغدادەو، و کلکردن بەش حکومەت فیدراڵی لە داهاتەیل ناوخوەیی، وەگەرد باسکردن لە باوەت نەفت.