شەفەق نيوز- دیمەشق
سەرچەوەیل سوریا، ئمڕوو جمعە، خەوەردان کە دویەشەو جەنگ سەختیگ کەفتیەسە ناوەین یەکەیلیگ لە سوپای سوریا و ئەندامەیلیگ لە هیزەیل هەسەدە، خوەرھەڵات شار حەلەب.
سەرچەوەیل وتن ئەو جەنگە لە دەورگرد ئاوایەیل ئیمام و رەسم کروم لە ریف دێر حافر خوەرھەڵات حەلەب بویە، ئەوەیش لە ئەنجام دزەکردن گرووپەیلیگ لە هەسەدە وەرەو خاڵەیل سوپا لە ناوچەگە.
سەرچەوەیلیگ مەیدانی دووپات کردت کە هیزەیل سوریا نواگیری لەو تەقەلا کردن، لە وەختیگ هیمان تەقەکردن ناوەین دوو لایەن هەس، وەگەرد ئامادەباشی هەردوگ لایەن.
ئی رویداوە دویای شکستیگ لە دویەم دانیشتن دانوسەنین ناوەین حکومەت سوریا و هیزەیل هەسەدە هات لە رێککەفتن لەبان جیوەجیکردن رێککەفتن 10ی ئادار، کە تەکبیر پویچەڵکردن هەسەدە و تیکەڵبوینی لەناو سوپای سوریا بوی و ئیدارەی شارەیل باکوور خوەرهەڵات سوریا بکەفێدە دەس حکومەت سوریا.
لەسای وازنەهاوردن هەسەدە لە فیدڕاڵی و رکداریی لە تیکەڵبوین هیزەیل هەسەدە جویر پارچەیگ سەروەخوەیی لە سوپا، ناکۆکی کەفتە ناو دانوسەنین دوو لایەن وە ئامادەبوین کلکریای ئەمریکا تۆماس براک، وەگەرد نوقڵاتەی نزیکەوبوین جەنگ ناوەینیان.
سەرچەوەیل دیاری کردن کە ناکۆکیەگە بەرزەو بوی لەناو ئەو دانیشتنە دویای ئەوە کە هەسەدە رکدار بوی لە داواکردن راسەوکردن راگەیانن دەستووری و رازی نەوی هیچ شاریگ لە باکوور خوەرهەڵات سوریا و بیرە نەفتەیل و مەرزەیل سنووری بەێدە دەس حکومەت سوریا، کە هیشت کلکریای ئەمریکا دەسبەێدەوەر و ئارامەو بکەێد، هەرچەن وەگەرد داوایەیل شاند هەسەدەو ڕێک نەکەفت.