شەفەق نیوز/ سەرۆک حکومەت فیدڕاڵی محەمەد شیاع سوودانی، و سەرۆک هەرێم کوردستان نێچیروان بارزانی، ئمڕوو دووشەممە، دووپاتکرد لە بان هاوکاری ئەرا نواگیریکردن "ئاڵنکاریەیل نیشتیمانی".
نویسینگەی سودانی لە بەیاننامەیگ رەسیە ئاژانس شەفەق نیوز وت، لە کۆتا میوانداریکردن ئمڕوو سەرۆک هەریم کوردستان نێچیروان بارزانی، لەمیانەی دیدارەگە باس لە ئەوزەڵکردن و پیشهاتەیل گۆڕەپان نیشتیمانی و ناوچەگە کریا، و پێویستی پاڵپشتی حکومەت فیدڕاڵی و سەرکەفتن جیوەجیکردن بەرنامەیل حکومی ئەرا دڵنیابوون لەوەگ خواست هاووڵاتیەیل لە سەرتاسەر وڵات وەدی بارێد.
هەمیش باس لە دۆسیەیل خزمەتگوزاری کریا کە پەیوەنی وە بەرژەوەنی هاوڵاتیەیل دیرێد، و خاسترین نمونە ئەرا رێکخسن پابەندبوینەیل ناوەین فیدڕاڵی و هەرێم، وەپای دەستوور، و ئەوەگ لە یاسای بودجەی گشتی بڕیار لەبانی دریایە.
هەردووگ لا وەپای بەیاننامەگە دووپاتکردن لە گرنگی پاڵپشتی و هاوکاری هاوبەش لەناوەین گشت هاز و لایەنەیل سیاسی لەپێناو رویوەرویبوین ئاڵنکاریەیل و لەوردن سەختیەیل وڵاتەگە، بەرژەنەوەی گشتی گەل عراق وەبی بان و ئەوزەڵداین وە ئامانج چەسپانن ئاسایش و بی وەیی و یەکڕزی نیشتیمانی.