شەفەق نیوز/ محمد شیاع سودانی، سەرۆک وەزیرەیل فیدراڵی و مەسرور بارزانی، سەرۆک حکومەت هەرێم کوردستان، ئمڕوو چوارشەممە، باس ناکۆکی و پرسە گیرهاتگەیل ناوەین هەولێر و بەغدا کردن و دووپات لەبان گرنگی دووارە دەسکردن وە هەناردەی نەفت کوردستان وە زویترین وەخت کردن.
شەوەکی ئمڕوو، سودانی رەسیە شار هەولێر پایتەخت هەرێمی کوردستان و لەلایەن سەرۆک حکومەت هەرێم پیشوازی لەلیکریا.
وەگەرد رەسینی، هەردگولا گردەوبوین ئەنجامدان، کە سەرۆک وەزیرەیل فیدراڵی وە پبشکەشکردن پیرووزبایی لە سەرۆک حکومەت هەرێم کوردستان دەسوەپی کرد وەبوونەی سەرکەفتن هەڵوژاردن پەرلەمان کوردستان، وتیش؛ سەقامگیری سیاسی هەرێم بەشیگ گەوهەرییە لە بناغەیل سەقامگیری گشت عراق.
هەرلیوا، سەرۆک حکومەت فیدراڵی دووپات لە گرنگی دروسکردن حکومەت نوو لە هەرێم کرد، و شیوەیگ کە ئاستی هاوکاریی ئیسەی ناوەین حکومەت هەرێم و حکومەت فیدراڵی بەرزەو بکەێد، وەگورەی بەیاننامەی حکومەت هەرێم کوردستان.
لە بەیاننامەگەی کە نویسینگەی سودانی بڵاوی کرد، باس ئەوە کرد کە باس فایلە هاوبەشەیل ناوەین حکومەت فیدراڵی و هەرێم کریا، دیارترینیان تەقەلای دووارە هەناردەکردن نەفت لە هەرێمەو، و دووپات لەبان گرنگی ڕێکخستنیان کریا وە شیوەیگ کە ئەمیدەیلی هاوڵاتیانلە گشت وڵات وەجی بارێد، بیجگە لە گرنگی جیوەجیکردن بڕیارەگەی دادگای فیدراڵی لەباوەت مووچەی فەرمانبەرەیل حکومەت لە هەرێم.
سودانی باس گرنگی مقیەتیکردن سەقامگیری سیاسی لە ناوچەگە کرد، جویر بەشیگ سەرەکی لە بنەڕەت ئارامی لە بەغدا و گشت عراق، دووپات لەبان گرنگی دروسکردن حکومەت نوو لە هەرێم کرد، کە ئامادەیی حکومەت فیدراڵی نشان دا ئەرا پیشکەشکردن هاوکاری لەی باوەتە، بیجگە لە گرنگی وەردەوامبوین ئاستەیل هاوکاری پەیوەندیی ئیسە ناوەین حکومەتی هەرێم و حکومەت فیدراڵی لەبان ئاست نیشتمانی.
وەگورەی بەیاننامەی نویسینگەی سودانی، باس ئامادەکارییەیل ئەرا ئەنجامدان سەرژماری دانیشتگەیل کریا، و خوازیاگی گشت تەقەلایگ ئەرا دڵنیابوین لە تەواوکردنی، وەتایبەتی دویای یەکلاییکردن لایەنە تەکنیکییەیل وەرد دەسەی ئامار لە هەرێم کوردستان عراق، لەوەر ئەو گرنگییە کە ئی باوەتە دیرێد لە پشتگیریکردن گامەیل گەشەپیدان و پلاندانان لە گشت کەرتەیل بەشدارن لە پیشکەفتن عراق.
لە دیدارەگە باس پیشهاتەیل رەوشەیل ناوچەگە کریا، وەتایبەتی وەگەرد رکداری هیزە داگیرکەرەیل زایۆنیستی لەبان فراوانکردن بازنەی جەنگ، کە دووپات لەبان گرنگی هەماهەنگی هەڵوێستەیل کریا، وەشیوەیگ کە مقیەتی لە ئاسایش و سەروەری وڵات بکەێد.
لە بەیاننامەگەی حکومەت هەرێم کوردستان هاتیش کە لە گردەوبوینەگەی ناوەین مەسرور بارزانی و سودانی، گفتوگۆکردن لە فایلە هاوبەشەیل و ڕەوت پەیوەندییەیل ناوەین هەرێم کوردستان و حکومەت فیدراڵی، وەتایبەتی ئەو پرسە گیرهاتگەیلە کە ناکۆکی لەبانیان هەس، لەوانەیش پرس مووچە، و بەش هەرێم کوردستان لە بودجەی گشتی فیدراڵی، و فایل دەسکردن وە هەناردەکردن نەفت، بیجگە گفتوگۆکردن لەبات ئامادەکارییە وەردەوامەیل ئەرا سەرژماری دانیشتگەیل گشتی.
لەباوەت موچە، سەرۆک حکومەت هەرێم کوردستان دووپات لە خوازیاگی دویرخستن پرس خەرجکردن موچەی هەرێم لە هەر ناکۆکی و گرژییگ سیاسی کرد، لەوەر رووشنایی بڕیارەگەی دادگای باڵای فیدراڵی لەباوەت موچەیل هەرێم، هەکاتی ئەو ناوچەیل عراق.
لەباوەت دووارە دەسکردن وە هەناردەکردن نەفت لە هەرێم یکوردستانەو، دووپات لەبان گرنگی دەسکردن وە پرۆسەی هەناردەکردن کریا وە زویترین وەخت، و کارکردن بۆ وەپشتسەرنان ئاستەنگ و کێشەیل وەردەم پڕۆسەگە، وەشیوەیگ کە خواست گشت هاوڵاتیەیل لە هەرێم کوردستان و گشت عراق وەجی بارێد.
لەباوەت سەرژماری گشتی دانیشتگەیل لە عراق، لە دیدارەگە دووپات لەبان خوازیاگی گشت تەقەلایگ کریا ئەرا دڵنیابوین لە تەواوکردن سەرکەفتگی، لەوەر ئەو گرنگییە کە دیرێد لە پاڵپشتیکردن گامەیل گەشەپیدان و پلاندانان لە گشت چینەیل، و دووپات کریا کە نووڕینەیل هەرێم کوردستان لەی رویە لەوەرچەو گریاس.