شەفەق نیوز/ محمد شیاع سودانی سەرۆک وەزیرەیل عراق، شەوەکی ئمڕوو چوارشەممە، رەسیە هەولێر پایتەخت هەرێم کوردستان، ئەرا دانوسەنین لەبان دروسکردن حکومەت نوو لە هەرێم کوردستان، وەگەرد چارەکردن چەن باوەتیگ.

 پەیامنێر ئاژانس شەفەق نیوز وت: سودانی لە ساعەت 9:00 شەوەکی رەسیە فڕوکەخانەی ناودەوڵەتی هەولێر، کە مەسروور بارزانی سەرۆک حکومەت هەرێم کوردستان چگە پیریەو.

سەرچەوەیگ ئاگادار ئەرا ئاژانس شەفەق نیوز وت: سەردانەگە لە چوارچیوەی تەقەلای حکومەت فیدراڵی ئەرا قایمکردن هاوکاری وەگەرد حکومەت هەرێم کوردستان تیەێد، و پەیاکردن چارەسەری ئەرا ئەو باوەتەیلە کە کاریگەری لەبان پەیوەندییەیل ناوەین هەرێم کوردستان و حکومەت ناوەندی دیرن.

وتیش: سودانی ئەوەسا چەوی کەفێدە مەسعود بارزانی سەرۆک پارت دیموکرات کوردستان، و نێچیروان بارزانی سەرۆک هەرێم کوردستان، و مەسرور بارزانی سەرۆک حکومەت هەرێم.

دیاری کرد کە چەوەڕی کریەێد دانوسەنین لەی دیدارەیلە لەبان سیوەیل قایمکردن پەیوەندییەیل سیاسی و ئابووری بوود، و پشتگیریکردن تەقەلایل دروسکردن حکومەت نوو لە هەرێم کوردستان خاوەن بەشداریکردن سیاسی فراوانتر بوود، و لە سەختیەیل ناو و دەیشت ئامادە بوود.

وتیش: سودانی وەرودەام بوود لە سەردانەگەی ئەرا شار سلێمانی، کە وەگەرد بافڵ تاڵەبانی سەرۆک یەکێتی نیشتمان کوردستان، و قوباد تاڵەبانی جیگر سەرۆک حکومەت هەرێم گرتوو بوود، ئەرا باسکردن چەن باوەتیگ گرنگ لەوانەگ کاروبار مووچە و شایستەیل دارایی، و هەناردەی نەفت، وەڕیەوبردن مەرزەیل سنووری گرێدەو.

سەرچەوەگە وتیش: سودانی لەی سەردانە خوازێد دووپات لە هەماهەنگی سەرکردەیل کورد لەبان گرنگی هەژمارکردن دانیشتگەیل بکەێد، کە گامیگ گرنگە وەرەو کارەیل دیموگرافی و خزمەتگوزاری لە ناوچە دابڕیایەیل.