شەفەق نیوز/ سوپای پاسداران ئیرانر قەیەغەی ئاهەنگەیل جەژن نەورووز لە چەن شاریگ کورد کرد، هەرچەن حکومەت زوور هاوردیە، وەلێ مەردم کورد لە چەن ناوچەیگ پیشوازی لە ساڵ نوو وە ئاهەنگ کردن. 

 سایت "هەنگو" دادپەروەری وت: هیزەیل ئەمنی و سەربازی لە شارەیل کورد، تواستنە قەیەغەی ئاهەنگەیل نەورووز بکەن، دیاری کرد کە هیزەیل چەکدار وە چەک نیمچە قورس لەناو بەشیگ لە ئاوای و شارەیل بڵاو بوین، لەلییان؛ کرماشان، ئەشنۆیە، سەقز، بۆکان، کە تەیمانەیل وەشکین دانان تا نەیلن مەردم گردەو بوون.

وتیش: هیزەیل سوپای پاسداران لە بەشیگ لە شارەیل کورد ریگری لە مەردم کردن لە رویکردن وەرەو شوینەیل ئاهەنگ نەورووز، و لە سەقز، هیزەیل حکومەتی تەیمانەیل خوەڵین و خاڵەیل وەشکین دانانە ئەرا قەیەغەکردن ئاهەنگەیل.

وەگورەی ئەو راپۆرتە، هەرچەن وە درۆنەیل حوکومەتی خریانە ژیر چەو، وەلێ هەر ئاهەنگ خوەیان کردن وە بەشداریکردن فراوانیگ، وتیش: هاوڵاتی کەماڵ تاهایی کانی سرخ لە گەڕەک تاجیناوی لە ئەشنۆیە لە رووژ جمعە 14ی ئادار وە دەس هیزەیل هەواڵگری سوپای پاسداران دەسگیر کریا، کە مەوقەی دەسگیرکردنی کەفتە وەر تونوتیژی، ئەوەیش لەبان بەشداریکردنی لە رێکخستن ئاهەنگەیل نەورووز.

وەرجەیە هەر لەی مانگە، سادق حوسەینی فەرماندەی سوپای پاسداران لە ئیلام وت: ری وە هویچ لایەنیگ نییە ئەرا دەرکردن مووڵەت رێکخستن ئاهەنگ لە نەورووز، وتیش: هەر کەسیگ رێکخستن کەێد یا پویل ئەرا ئاهەنگ گردەو کەێد، چ لەبان ئەنتەرنێت یا لە راسی، ئەوەسا کەفێدە وەر ریکارەیل زبریگ.

 لە ساڵەیل گوزەشتە، بڕیگ لە کوردەیل ئیران لەوەر بەشداریکردن لە ئاهەنگەیل نەورووز دەسگیر کریان، وەلێ لەبان ئەو هەمکەی دەسگیرکردن و هەڕەشەیلە، پارچە ڤیدیۆیلیگ دەرچگن نشان ئاهەنگەیل پیشوازی لە نەورووز لە چەن شاریگ دەن لە پارێزگای ئازەربایجان خوەرئاوا و کوردستان، وە بەشداریکردن فراوانیگ لە ژن و پیاوەیل.