شەفەق نیوز/ وەڕێەوبەرایەتی وەرگری شارستانی لە سلێمانی، ئمڕوو یەکشەممە، هویردەکاریەیل ئەو تەقینەوە راگەیان ک لە کافتریای کەستانە لە جادەی سالم ناوڕاس شارەگە ڕویدا.
رێکان جەماڵ قسەکەر وەرگری شارستانی لە کۆنگرەیگ رووژنامەوانی ئاژانس شەفەق نیوز ئامادەی بوی وت: لەوەر دەرچگن گاز و کۆنتڕڵ نەکردن لەلایەن کراکارەیل وە دەسگ فریاکەفتنەگە ک بایەت بوی ئەرا نواگردن رویداوەگە بوەسنەی، دیاری کرد ک تەقیان لویلەی گازەگە بویە هووکار زەخمداری سووک دوو کراکار، بریانە خەسخانەی شار، و تەندروسییان ئارامە.
رێکان وتیش: هەنای تیمەیل وەرگری شارستانی رەسیە دەسمیەتی، سێیان لە ئەندامەیل وەرگری شارستانی کەفتنە وەر تاسیان وە گازەگە.
رێکان دیاری کرد ک رویداوەگە لە ساعەت دە وچارەک بوی، تەنیا زەرەد رەسانە ئاشخانە و نانەواخانەگە.
قسەکەرەگە وتیش: ئیجویر رویداوەیلیگ لە وەرز تاوسان باوە لەوەر بەرزەوبوین پلەی گەرمی، باوجی کارەگە ریکارەیل راسیگ ورێکیگ خوازێد تا لە وەخت خوەی نوای بگرێد.
وەرجەیە، شەوەکی ئمڕوو یەکشەممە، سەرچەوەیگ ئەمنی ئەرا ئاژانس شەفەق نیوز وت: تەقینەوەیگ لەناو کافتریایگ لە ناوراس شارەگە بویە هووکار زەخمداری دوو کراکار و تاسیان سێیان لە ئەندامەیل وەرگری شارستانی.