شەفەق نیوز/ بڕیگ لە رێکخراوەیل و چالاکوانەیل گەنج، وە ئامادەبوین وەڕێۆبەر باخچەیل سلێمانی، ئمڕوو پەنجشەممە، داوای گرنگیدان و ئاویاری باخچە و سەیرانگەیل لەبان ریە سەرکیەکان شارەگە کردن تا هشکەو نەوون.
ئەیمەن غازی وەرپرس رێکخراو گەنجەیل دیموکراتی لە کۆنگرەیگ رۆژنامەوانی ئاژانس شەفەق نیوز ئامادەی بوی وت: مەترسی و نیگەرانی لە هشکەوبوین درەختەیل لە بان ریەیل و باخچە و سەیرانگەیل هەس لەوەر کەم دابینکردن ئاو ئەرایان، وەتایبەت لە سەیرانگەی هاواری شار گەورا.
غازی داوا لە حکومەت خۆجێیی و پەیوەندیدارەیل کرد پویل تەرخان بکەن تا نواگیر بیاوانبوین شارەگە بکەن و ئی پرۆژەیل گەورا و ستراتیژییە رزگار بکەن.
وتیش: ئەگەر چارەیگ پەیا نەکەیمن و ئی هشکیە لەوەر کەم وارانیەگەی ئەمساڵ و کەمی ئاو لە بەنداوەیل هەرێم نەوسنیمن ئەوەسا ٨٠ لەسەد ئی دارەیلە هشکەو بوون.
لەلای خوەییش کامەران ساڵح لە کۆنگرەگە وت: لە مانگەیل نیسان و ئایار و حوزەیران دوو مەلیۆن لەتر ئاو خوازیمن وە تەنکەر بڕەسێدە باخچە و سەیرانگەیل و ناوڕاس جادەیل، و لە مانگ تەمووز و ئاب و ئەیلوول و تەشرین یەکەم ٤ مەلیۆن لەتر ئاو خوازیمن ئەرا ئاویاری باخچەیل و ساڵانە دوو بوودجە بایی ٥ ملیار دینار و یەک ملیار و ١٠٠ هەزار دینار تر خوازێد ک ئمساڵ هیچ پویلیگ لەلایەن وەزارەت دارایی لە هەرێم خەرج نەکریاگە، و داوای خەرجگرۆنی کردن تا ئاویاری شوینە سەوزەیل شارەگە بکریەێد.