زەڕنگەر دلێر تاهر ئەرا ئاژانس شەفەق نیوز وت: جمەی بازار تەڵا لەی رووژەیلە فرە کەمە لەوەر بانوخوارکردن نرخەگەی لە بازاڕەیل جەهانی، ک یەک کێلو تەڵا ئیرنگە رەسێدە زیاتر لە ٦٥ هەزار دۆلار.
تاهیر وتیش: جیگرنەوین نرخ تەڵا لە بازاڕەیل ناوخوەیی وەشیوەی گەورەیگ کاریگەری لەبان ئارەزوو هاوڵاتیەیل ئەرا سەنین تەڵا داشت، وەگەرد ئەوەیش لەناو بازاڕەیل نرخەگەی جیگر نییە.
وتیش: جاروبار نرخ یەک کێلوگرام تەڵا نزیکەی دوو هەزار دۆلار بەرزەو بوود، یا داوەزێد، و یەیش کاریگەری گەورەیگ لەبان جویلەی بازاڕەگە دیرێد.
لەلای خوەییش؛ رزگار جەلال زەڕنگەر ئەرا ئاژانس شەفەق نیوز وت: چشتەیلیگ هەس کاریگەری لەبان نرخ تەڵا لە بازاڕەیل دیرن، کاریگەرییگ ناوخوەیی و دەیشتەکی، دەیشتەکیەگە پەیوەندی وە جویلەی بۆرسەی جەهانی دیرێد، و ناوخوەییەگە پەیوەندی وە نرخ دۆلار و نرخ هەواڵەکردن، و یەیش فرە لەمەردمەگە لەلی نیەزانن.
لەلای خوەیشش، عەبدولحەمید محمد زەڕنگەر ئەرا ئاژانس شەفەق نیوز وت: هاوڵاتتیەگە وەدینار تەڵا سینێد و فرووشێد، و نرخ دینار لەبان نرخ دۆلار وسیاگە، ک ئیمە تەڵا وە دۆلار سینیمن، و یەیش هیلێد نرخ تەڵا هەر ماوەیگ جاریگ بانوخوار بکەێد.