شەفەق نیوز/ ئەنجومەن سلێمانی، ئمڕوو دووشەممە، داوا لە لایەنەیل پەیوەندیدار لە حکومەت پارێزگاگە کرد، یاسایل بیوەیی عراقی ئەرا مقەیەتیکردن گیان و ماڵداری هاووڵاتییەیل جیوەجی بکریەن.
ئەنجومەن پارێزگاگە ئمڕوو گردەوبونیگ فراوان وە ئامادوبوین هەڤاڵ ئەبوبەکر پارێزگار سلێمانی، و وەڕیەوبەر وەرگری شارستانی و دەسەی بەرهەمهاوردن و فەرمانگەی بەشەوکردن بەرهەمەیل نەفتی ئەنجام دا، ئەرا باسکردن داناین ریکارەیل بیوەیی لەناو ماڵەیل، لەپشت ئەو تەقیانە ک لە هەفتەی گوزەشتە لە ناوچەی کازیوە بوی.
ئازاد حەمە ئەمین سەرۆک ئەنجومەن پارێزگاگە لە کۆنگرەیگ رووژنامەوانی ئاژانس شەفەق نیوز ئامادەی بوی وت: ئەنجومەنەگە لەناو ئەو گردەوبوین فراوانە داوای جیوەجیکردن یاسایل بیوەیی عراقی کرد، و گرنگی وە خاسی ئەو غازە بیریەێد ک ئەرا هاووڵاتییەیل لە گشت ناوچەیگ دابینی کەێد.
ئەمین وتیش: بایەتە دەسەیگ ئیداری ئەرا تاقیکردن سیستەم غاز دروس بکریەێد، و حکومەت ئامێز نوو و ئەندازیارەیل ئامادە بکەێد تا چەودیاری کارەگەی بکەن، و دووپات لەوە کرد ک شارەوانی مووڵەت بیناکردن وەگەرد خوازینەیل بیوەیی بیەێد.
لەلای خوەییش، عەمید دیار ئیبراهیم وەڕیەوبەر وەرگری شارستانی لەناو کۆنگرەگە وت: ئەو رویداوە ک لەناو ماڵیگ لە ناوچەی کازیوە رویدا هووکارە سەرکیەگەی نزەکردن غاز بوی.
ئیبراهیم وتیش: داوایل تایبەت وە سیستەم گرمەوکردن ماڵەیل لەلایەن کۆمپانیای مووڵەتدار سەختەو کریا، و ئەوەسا ئەو داوایلە لەبان ئەو کۆمپانیایلە سەختەو کریەن.
لە هەفتەی گوزەشتە، زیاتر لە ٢٠ کەس گیانیان لەدەسدان و ٥٠ کەسیش زەخمدار بوین، لە دوو تەقیان تووڕ غا، لە سلێمانی و دهۆک.