شەفەق نیوز ـ سلێمانی
وەڕێوەبەڕایەتی چاکسازی ژنەیل و مناڵەیل لە سلێمانی، ئمڕوو چوارشەممە، ئاشکرا کرد 72 ژن سزادریاگ وە سزایەیل دادوەری جوراوجویر لە ناو چاکسازی هەس، لە ناویاین 14 سزادریاگ وە لەسێدارەدان، دووپات کرد لەبان وەردەوامی پێشکەشکردن چەودێری تەندروسی و کۆمەڵایەتی و بەرنامەیل پەروەردەیی و ڕاهێنان ئەرا بەندکریاگەیل.
وەڕێوەبەر چاکسازی ژنەیل و مناڵەیل لە سلێمانی، فوئاد جەزا، ئەرا ئاژانس شەفەق نیوز وت، "شمارەی ژنەیل سزادریاگ ئیرنگە لە ناو چاکسازین رەسێدە 72 زیندانی"، دیاریکرد سزایەیل دەرچگ لە وەرانوەریان پەیوەنیدارە وە دۆسیەی جوراوجویر، دیارترینیان کوشتن و دزی و مادەی بیهووشکەر و ساختەکاری.
جەزا وت: "لە ناو زیندانیەیل 14 ژن هەس سزای لەسێدارەدان وەرانوەریان دەرچگە، و چەوڕێ جیوەجیکردن سزاگەن"، دیاریکرد "شمارەی مناڵەیل ناو چاکسازی جێگیر نییە، و ئاڵشتبوود وەپای حاڵەتەیل هاتگ و چگنەدەێشت".
ئاشکرا کرد، وەڕێوەبەڕایەتی چاکسازی چەودێری تەندروسی و کۆمەڵایەتی ئەرا زیندانیەیل دابین کەێد، چوینکە ئەرا هەر زیندانیگ لە وەخت هاتنەناو فۆرمیگ تایبەت واز کریەێد و کەفێدە ژیر وشکنین پزیشکی، وەرجە بەشەوکردنی وەبان بەش دیاریکریاگ وەپای تەمەن.
دیاریکرد ئەرا رێکخسن خول و بەرنامەی پەروەردەیی و ئەوزەڵداین ئەرا بەندکریاگەیل، وت: شمارەیگ لە لیان لە ماوەی سزاگەیان توەنستنە خوەنین ئامادەیی تەواو بکەن، لە وەختیگ ئەوان ترەک درویژە وە خوەنین زانکۆییان دانە لە ناو چاکسازییەوە.
لەباوەت خزمەتگوزاری خوەراک، جەزا دووپات کرد، ژەمەیل پێشکەشکریاگ ئەرا زیندانیەیل "جێگیرە و کاریگەری قەیرانەیل ئابووری یا دارایی لەبانی نییە"، هەمیش دووپاتکد لەبان ئەوەگ گوزەران زیندانیەیل لە ناو چاکسازی "جێگیرە و ها ژیر کۆنترۆڵ"، وەگەرد وەردەوامی پێشکەشکردن خزمەتگوزارییەیل تەندروسی و کۆمەڵایەتی و راهێنان ئەرایان.