شەفەق نيوز/ سەندیکای رووژنامەنویسەیل کوردستان، وە بوونەی 127 ساڵیاد دامەزریان رووژنامەگەری کوردی، ئاهەنگ لەژیر دروشم "چاکسازی و رێکخستن راگەیانن.. میکانیزمەیل و پڕۆسەیل چارەسەری" سازێد.

رسوومەیل ئاهەنگەگە وەلایەن نەقیب رووژنامەنویسەیل کوردستان وە تاریگ دەسوەپی کرد لەناوی وت: دووارە رێکخستن و راسەوکردن یاسای رووژنانویسەیل کوردستان هەمیشە لەناو پیلانەیل ئیمە بویە، و داوای رێکخستن راگەیانن کرد ئەرا مقیەتیکردن رووژنامەنویسەیل وەگورەی پارێزداری و یاسای کار.

 هەمیش وت: تەکنەلۆژیا فرە وەزوی گەشە کەێد لە گشت ئاست و چینەیل، و چوارچیوەی ئی زانستە کاریگەری لەبان کار راگەیانن داشت، و لە کوردستان کاریگەریی گەورەتر بوی، ئەراوە جیوەجیکردن گامەیلیگ جددی خوازیمن ئەرا دووارە رێکخستن راگەیانن لە کوردستان.

پەیامنێر ئاژانس شەفەق نیوز وت: نوخبەیگ لە ئەکادیمی و رووشنهویر و رووژنامەنویسەیل لەو ئاهەنگە ئامادە بوین، و وتار و گفتوگۆ لەباوەت میژوو رووژنامەگەری کوردی پیشکەش کریا، کە باسی کریا وە میژوویگ پڕ لە شانازی و خەبات سیاسی و رووشنهویری و نیشتمانی، و هەرچەن وە رووژەیل سەختیگ رەد بویە، توەنست وەردەوام بوود و بڕەسێدە ئی رووژە کە ئەنجامیگ راگەیاننە لە ئاسمان ئازادی.

   وتیش: بەرنامەی بوونەگە دوو کۆڕ هاناوی، یەکەمیان وەناونیشان "رێکخستن راگەیانن"، و دویەمەگە "کاریگەرب زیرەکی دەسکرد و سەختیەیل لە ناوی راگەیانن"، کە بڕیگ ئاکادیمی و رووژنانویسەیل لەناو بەشداری کردن کە نووڕین و رەخنەیل خوەیان پیشکەش کردن.

 لە کۆتایی ئاهەنگەگە، رووژنامەنویس ناودیار جەماڵ خەزنەدار خەڵات رووژنامەگەری تەڵایی وەقی پیشکەش کریا، ئەرا رۆڵ دیاری لە بەڵگەکردن میژوو راگەیانن، لە نویسانن ئینسایکلۆپیدیای رووژنامەگەری کوردی.

هەرێم کوردستان، ئمڕوو سێشەممە، 22 نیسان 2025، یاد رووژ رووژنامەگەری کوردی کەێد، کە یەکەمین شمارەی رووژنامەی "كوردستان" دەرچگە، و دامەزریان سەندیکای رووژنامەنویسەیل کوردستانە.