شەفەق نيوز/ نێچیروان بارزانی سەرۆک هەرێم کوردستان، ئمڕوو دووشەممە، وەگەرد یان برییم قونسوڵ گشتی فەرەنسا لە هەرێم کوردستان، باس نووەوبویەیل لە ناوچەی خوەرهەڵات ناوڕاس کرد، وەگەرد دووپات لە گرنگی ئارامکردن و پشتبەسین وە گفتوگوکردن ئەرا چارەسەرکردن جەنگەیل.

 سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: نێچیروان بارزانی پیشوازی لە قونسوڵ فەرەنسا کرد، و وەگەردی باس دویاترین نووەوبویەل لە ناوچەگە کرد، و شکیان جەنگ و وەردەوەردەیل وەبان ئارامی هەرێمی و ناودەوڵەتی، هەمیش ئەو رخباریەیل ئەگەرییە لە فراوانبوین ژاوەژاو.

 بەیانامەگە وتیش: هەردوگ لایەن رێککەفتن لەبان گرنگی تەقەلاداین ئەرا وسیان جەنگ، و دووپات لە هەڵوێست فەرەنسا و هەرێم کوردستان کردن کە بەرزکردن وەردەوەردە رەت کەێدەو، و داوای چارەسەرکردن ناکۆکیەیل لەڕی دیبلۆماسی و گفتوگوکردن کەێد.

دیاری کرد کە قونسوڵ فەرەنسا باس تەقەلایەیل وڵاتەگەی و سەرۆک ئیمانۆئێل ماکرۆن کرد ئەرا وسانن جەنەگە، لە چوارچیوەی ئەوروپی، لە تەقەلایگ ئەرا سنووردارکردن جەنگ و گاڵداین لایەنەیل ئەرا گفتوگوکردن.

 لە دیدارەگە باس پەیوەندییەیل ناوەین فەرەنسا و عراق و هەرێم کوردستان کریا، و پەیوەندییەیل ناوەین هەولێر و بەغدا، وەگەرد بڕیگ باوەت گرنگ لەلای هەردوگ لایەن.