شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، وەگەرد شاندیگ لە پەرلەمان و وەزارەت هاوکاری و ئابووری و گەشەپیدان ئەڵمانی گردەو بوی، لە چوارچیوەی کارمەنەی فرەی لە سێیەم رووژ کۆنفرانس ئاسایش میونشن.

 سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: سەرۆک نێچیروان بارزانی، نیمەڕو ئمڕوو، وەگەرد شاندیگ لە پەرلەمان ئەڵمانیا و وەزارەت هاوکاری ئابووری و گەشەپیدان ئەڵمانی گردەو بوی، کە نيلس شميد، قسەکەر کاروبار دەرەکی و هەماهەنگکار  گرووپەگە لە دەسەی پەیوەندییەیل دەرەکی بە حزب دیموکرات کۆمەڵایەتی (SPD)، و ئەندرياس شوارز، ئەندام دەسەی وەرگری، ميتن هاكڤيردي، ئەندام دەسەی بوودجە، و نيلس ئانين، وەزیر دەوڵەت لە وەزارەت هاوکاری ئابووری و گەشەپیدان ئەڵمانی لەناو شاندەگە بوین.

لە دیدارەگە دووپات لەبان گرنگی وەردەوامی پەیوەندییەیل ناوەین ئەڵمانیا و عراق و هەرێم کوردستان کریا، و را و نووڕینەیل لەباوەت رەوشەیل ناو عراق و هەرێم کوردستان، وەگەرد باس گەشەیل ناوچەگە.

سەرۆک نێچیروان بارزانی دووپات لە گرنگی قایمکردن هاوکاری وەرد ئەڵمانیا کرد، وەتایبەت لە چین گەشەپیدان توانایەیل وەرگری ئەرا هیزەیل پیشمەرگە، و مقیەتیکردن ئاسایش و ئارامی.

 وەگەرد ئەوانە، ئەندامەیل شاندەگە ئافەرین لە ڕۆڵ هەرێم کوردستان لە ناوچەگە کردن، و دووپات کردن لە قویلایی برادەری ناوەین هەرێم کوردستان و ئەڵمانیا، هەمیش دووارە پابەندبوین وڵاتیان وە پشتگیریکردن عراق و هەرێم کوردستان نووەو کردن، و باس گرنگی فراوانکردن هاوکاری هاوبەش لە چینەیل گەشەپیدان، ئاسایش کردن، و گرنگی وەردەوامی هەماهەنگی ئەرا نواگیریکردن سەختیەیل ئەمنی.

   لە دیدارەگە باس هەڵوژاردن پەرلەمان کوردستان کریا، و تەقەلایل دروسکردن حکومەت نوو لە هەرێم کوردستان، و رەوش ئاوارەیل و پەنابەرەیل و پیکاتەیل لە کوردستان، و ئاڵشبویەیل لە سوریا.