شەفەق نیوز/ مەسرور بارزانی سەرۆک حکومەت هەرێم کوردستان، ئمڕوو دووشەممە، بەیاننامەیگ دەرکرد وەبۆنی ساڵیاد شەشەم لە جینۆساید و پەلامارە توندەگان لەلایەن ریخریاگ داعش دژوە هاووڵاتیە ئەیزیدیەگان لە شەنگال و دەورگردی.
بارزانی لە بەیاننامەگە ک رەسیە ئاژانس شەفەق نیوز وت: ئمڕوو یادکردنەوەی ساڵ شەشەم کەیمن لە داگیرکردن قەزای شەنگال و دەورگردی وه ده‌س داعش تیرۆریست ، و جینۆسایدکردن خوەشک و برا ئەیزیدیەگان.
وتیش: لەی بۆنه خه‌فه‌تباره یاد شەهیدەگان کەیمن ک بوینە قوربانی ئی تاوانەیل ناشرینە، دویای ئەوەگ هەزاران لە بیتاوانەیل کەفتنە وەر جینۆساید و رفانن وسەرگەردانی.
بارزانی ئاماژەدا؛ ئەو جینۆسایدە ک رەسیە قەزای شەنگال ودەورگردی یەکیگە لە ناشرینترین تاوانەیل دژوە مرۆفایه‌تی لە مێژوو نوو، و بەشیگ بوی لە پەلامار گەورایگ لەلایەن تیرۆرستەگان داعش دژوە گەل کوردستان، وئەیزیدیەگان لەبان گشت نەهامەتیەگان و فەرمانەیل جینۆساید، مه‌نن لە وەرگریکردن لەبان زوان وکەلتور وشناسنامە وئاین خوەیان.
هەمیش وت: لەی بۆنه خه‌مناكه، دوینم ک لە وەرپرسایەتیە وەگشت رێزیگ یاد ئەو قوربانیەیل سەربەرزە ک هێزەیل پێشمەرگە پێشکەشی کردن لە رزگارکردن شەنگال و دەورگردی، وەسەرکردەیی سەرۆک مەسعود بارزانی، وهەمیش هەڵوێست گەل کوردستان به‌رزنرخنیمن لە باوەشکردنیان وە خوەشک وبرا ئەیزیدیەگان و نیشتەجی کردنیان.
و دووپاتکرد؛ لەیرا بایەسە گشت لایەنەگان پشت یەک بگرن ئەرا دووارە ئاوەدانکردن شەنگال و ئاسایی کردن رەوش شارەگە، وەشیوەیگ ک هەیچ هێزیگ چەکدار بیگانە یا میلیشیا لەناوی نەمینێد، وەمەرجیگ پارێزی و ئارامی ناوچەگە دابین بکریەێد وەهەماهەنگی ناوبەین حکومەت کوردستان و حکومەت فیدڕاڵی.
وتیش: تەقەلایل حکومەت هەرێم کوردستان هیمان وەردەوامە ئەرا ئازادکردن ئەوانەگ مەننە لە رفیایە ئەیزیدیەگان ک هیمانی چارەنووسیان نادیارە، ولە ژمارەی بیسەرو شوونەیلن، وئەویش وەهەمان شیوەی هەوڵە وەردەوامەگانی ک سەرکەفت لە ئازادکردن بڕیگ لە رفیاگەیل لە دەس داعش.
بارزانی بانگەواز ئەرا حکومەت فیدڕاڵی کرد ئەرا قەرەبووکردن خوەشک و برا ئەیزیدیەگان و دەسمیەتی ئاوارەگانیان، و جەختکرد لەبان گرنگی دابین کردن ژینگەی گونجیاگیگ ئەرا چگنەوەیان وەرەو ناوچەیلیان وەسەر بەرزی.