شەفەق نیوز- ئمڕوو سەرەێ تاوسان کوردییە.
ئی هەواڵە دیرێ دە بڕێ لە شەواچەێل مەجازی کوردی، دویشرێ.
ساڵ و مانگ کوردیاتی وە بان گوڕیان کەژ و هەوا دیارییەو دکرێ ئوو دەس‌پێکردن و نامگیر کردن هەر وەرز و مانگێ لەێ، دە هەر وڵاتێ چ گەرمیان و چ زوزان و کێوەستان، کەفتگە وە کەژ و هەواێ ئەو ناوچەگە ئوو ئەڕا یەسە ک دەس‌پێکردن و وەسەرچگن هەر وەرزێ دە هەر ناوچەیێگ لە ناوچەێلێ تر کوردەواری جیاوازە.
نەداشتن دەوڵەتێگ کوردی دە دریژاێ میژوو، ئی شێواشێو نامگیر کردنەێلە فرەترەو کردگە.
رودوس فەیلی (مستەفا بەیگی) موحەقق فەرهەنگ کوردیاتی دەێ بارە دویشێ: وەوجوورە ک دیارە ساڵ کوردی هادەێ پەنج وەرز بداشتووبێ نە چوار وەرز ک دە نام عامەێ کورد ئەیانەن "وهار، تاوسان، پاییز، سەردەوا، زمسان" ئوو پاییز کوردی دە دومادوماێل تاوسان تا نامڕاس پاییز ئێرانی دەس‌وەێ دکرێ.
ئەوی وتگە: هەر چەن ک نام ئی وەرزەێلە ک فرە لەێیان، دە زوانەێل فارسی و ئەڤغانی و تاجیکی هەم نزیک وە یەکە، بەڵام ئی نامەێلە چمان هە کوردی ببن چوون تاوسان لە تاویان و زەووب بیین وەفر دیاێ، ئوو زمسان لە زم، ک دە زەم زەمهەریر ک نام کوردی (نەنگە سەرما) ئستوورەێ ئێرانی- کوردیێگە هەسەێ ئوو وە ساسەرەێلێ ک کووچەرەێل کورد دە کێوەسانەێلە وە خەڕگ و کوچک و کڵووم دگرنەیان دویشیمن: "زم‌گە" ک هەمجا نام "زم" هادەێ، ئوو نام "سەردەوا" ک نامێ ها وە خوێیە، هن وەختێگە ک هنک دجمێ ئوو واێ سەرد دکەفێکە رێ و گەڵارێزانەو دبێ ئوو لەێ هساوە دبینیمن ئی نامەێلە گشتێ پەیوەندی دیرن وەگەرد کەژ و هەوا.
ئەوی لە فەرهەنگ‌وانەێل عامەێ کورد خواستگە ک دە ئی بارەێلە بنەجووری فرەتر و پسپۆری‌ترێ بکەن و گشت تەحقیقەێلەیان وەرد یەکتری ئەڵسەنگنن تا بن‌دوروس ئەیانە بدەرارنە دەر.