شەفەق نیوز- ئەڵگەردان تایبەت

دەسەڵاتەیل پەیوەندیدار وە مقیەتییکردن کەلەپوور کەلتووری لە ئیران رۊوەڕۊی قەیرانیگ رووژوەرووژ زیادبۊ بوونەو لە وەڕێوەبردن و ئاسایش شۊنەیل ئاسەواری، کە وە ئاشکرایی لە پارێزگای کرماشان خوەراوایی دەرکەفێد کە هەزاران شۊن میژوویی لەخوەی گرێد، و یەیش لە سای کەموکوڵی خەسیگ لە کادیرەیل و فێرکریاگەیل، وەپای ئەوەگ وەرپرسیگ ئەمنی دیار لە کەرت مقیەتییکردن کەلەپوور ئیرانی ئاشکرای کرد.

 وە پشت بەسینن وە راپۆرت ئاژانس "ئیرنا"ی ئیرانی و ئەڵگەردان لەلایەن ئاژانس شەفەق نیوز، و لەماوەی دیاریگ کە فەرماندەی یەکەی مقیەتییکردن کەلەپوور کەلتووری لە ئیران، عەقید ئایەت ئەحمەدی، وەگەرد پارێزگار کرماشان گردەو کرد، ئەحمەدی چگە ژیر ئەوەگ فشارەیل ئیسە چەودیاریکردن تەکنیکی و مەیدانی راستەوخۆ ئەرا گشت شۊنەیل ئاسەواری کردگە وە چشتیگ کار مەهاڵە، کە گاڵ دەسەڵاتەیلەو دا ئەرا نەخشەکیشان پەنابردن ئەرا تەکنەلۆژیای نوو، جویر فرۆکەیل بیفڕۆکەوان (درۆن) و سیستەمەیل زیرەک، ئەرا پڕەوکردن کەلەوەر ئامرازەیل و کەسەیل.

 ئی قەیرانە رووشنایی خەێدە بان کرماشان جویر یەکیگ لە خاڵە گرنگەیل لەبان نەخشەی کەلەپوور ناودەوڵەتی و ناوخۆیی؛ کە پارێزگاگە زیاتر لە چوار هەزار ئاسار میژوویی دیرێد کە تا ئیسە ئاشکرا کریانە، لەناویان نزیکەی 2300 ئاسەوار توومارکریاگ لەبان لیست کەلەپوور نیشتمانی، وەگەرد مۆزەخانەیل و کۆمەڵگەیل ئەندازیاری بیوەێنە، جویر "کاروانسەران" (خانەیل میژوویی) کە بەشیگ بنەڕەتی لە ریەیل بازرگانی میژوویی کۊنە.

 فشارەیل لەبان کەلەپوور مەردم 

 قەیران کەموکوڵی سەرچەوەیل تەنیا لەبان پارێزگای کرماشان نیەوسێد، بەڵکم دریژەو بوود ئەرا دیمەن ئاسەواری لە ئیران وە شیوازیگ گشتی، کە یەکەی مقیەتییکردن سەرپەرشتی نزیکەی 43 هەزار ئاسەوار و شۊن توومارکریاگ نیشتمانی کەێد، و زیاتر لە 260 مۆزەخانە، وەگەرد 30 شۊن توومارکریاگ لەبان لیست کەلەپوور ناودەوڵەتی ئەرا یۆنسکۆ و نزیکەی 28 کۆمەڵگەی میژوویی کە لەناو لیست ئەو شۊنەیلە دریەنە قەڵەم کە هەوەجە وە مقیەتییکردن باڵا دیرن.

 لە سای زیایبۊن چالاکییەیل هەڵکەنین ناڕەوا و دروسکردن پێچەوانەی یاسا لەناو بازنەی شۊنەیل ئاسەواری، ئەحمەدی دیاری کرد کە وژاردەی ئامادە لە ئیسە پشت بەسانن وە تەکنەلۆژیایە جویر رییگ ئەرا کەمەوکردن وەخت وەڵامدان ئەرا داواکارییە ئەمنییەیل، چۊنکە بڕیارە فرۆکەیل بیفڕۆکەوان و سیستەمەیل ژیر کار بکن لەبان چگن داتایەیل سەرپێچییەیل هەگ رۊ دان ئەرا تیمە مەیدانییەیل.

 ئاڵووزییەیل پەیکەری و یاسایی

 قسەیل وەرپرسە ئیرانیەگە رەهەندەیل قۊلتر ئەرا قەیرانەگە ئاشکرا کەێد کە لە دابینکردن دارایی رەد کەێد، تا دریژەو بوود ئەرا سەربازگیری و بیرۆکراسی؛ چۊنکە پاوەنەیل ئیداری لە ساڵەیل دۊایی کاریگەری داگە بان داین کادیرەیل گەنج و سەربازەیل خزمەت ناچاری وە یەکەی مقیەتییکردن.

 دەسەڵاتەیل لە ئیسە دانوسەنین وەگەرد دامەزراوەی سەربازی کەن ئەرا وازکردن دەروازەی کیشان سەربازەیل لە هەڵگرەیل بڕوانامەی زانکۆیی ئەرا چارەسەرکردن کەموکوڵی مەیدانی.

هەمیش راپۆرتەگە رووشنایی خستە بان تیکەڵبۊن دەسەڵاتەیل وەگەرد لایەنەیل شارەوانییەیل و دامەزراوە ناوخۆییەیل، کە لایەنەیل مقیەتییکردن کەلەپوور ناچار بوون وە دەسکرن وە رێکارەیل دادوەری خەرج فرە لە رۊ دارایی و ئیدارییەوە ئەرا وەرگردن بڕیارەیل رمانن ئەرا بینا پێچەوانەیل، و لەخوەیگردن خەرجییەیل لاوەردنیان لە بودجەی وەکارخستن سنووردار خوەیان.

 شارەزا ناودەوڵەتییەیل لە بوار پاراستن کەلەپوور هوشداری دەن لەوەگ پشت بەسانن وە چارەسەرە تەکنیکییەیل تەنیا، وە بی چارەسەرکردن بنەڕەتی ئەرا دامەزرانن و ئامادەکردن کادیرەیل و دابینکردن مقیەتی یاسایی ئەرا ژینگەی چواردەور ئاسەوارەگە، شایەت بەشیگ فرە لە کەلەپوور ماددی ئەرا ناوچەگە بیلێد لە وەردەم خراوەوبۊن و زەرەد یا بازرگانیکردن ناڕەوا.