شەفەق نیوز- کەرکوک

زەویلەرزەیگ کە تونیەگەی رەسیە 3.9 پلە لەبان پەیمانەی رێختەر، شەفەق ئمڕوو جومعە، دا لە ناوچەیل ناوەین پارێزگای کەرکوک و قەزای چەمچەماڵ لە پارێزگای سلێمانی، و دانیشتگەیل کەرکوک و چەمچەماڵ و ناوچەیل هاوسا لەلی هاتنە ئاگا، وە بی توومارکردن هیچ زەرەدیگ گیانی یا ماددی.

سەرچەوەیگ لە دەسەی گشتی کەشوهەوا و زەویلەرزەناسی ئەرا ئاژانس شەفەق نیوز وت، کە چەودیاریەیل دەسەگە زەویلەرزەگە توومار کردنە، و دیاری کرد کە سەنتەری کەفتیەسە ناوەین پارێزگای کەرکوک و قەزای چەمچەماڵ و لە قۊلی 9 کیلۆمەتر لەژیر روی زەۊ.

سەرچەوەگە وتیش کە سەنتەر بومەلەرزەگە لە نزیک ئاوای "زەنان" سەروە ناحیەی سەنگاو بۊە، و زەویلەرزەگە رخیگ لە ناوەین شمارەیگ لە خەڵکەگە دروس کرد، کە بڕیگ لە دانیشتگەیل ماڵەیلیان چووڵ کردن جویرر لە وەختیگ لایەنە پەیوەندیدارەیل دووپات کردن لە توومارنەکردن هیچ زەرەدیگ گیانی یا ماددی تا ئیسە، وەگەرد وەردەوامبۊن وەدۊاچۊن چالاکی زەویلەرزەیی لە ناوچەگە.

 ئی زەویلەرزە لە وەختیگ تیەێد کە پارێزگای کەرکوک چالاکییگ زەویلەرزەیی دیاریگ وەخوەی دوینێد، کە دەسەی گشتی کەشوهەوا و چەودیاریکردن زەویلەرزە لە سەرەتای مانگ ئاب ئیسە خەوەردا لە توومارکردن 20 زەویلەرزە لەماوەی چوار رووژ لە کەرکوک و ناوچەیل هاوسا، کە فرەیان لە خوەرهەڵات و باکوور خوەرهەڵات پارێزگاگە وەرەو قەزای چەمچەماڵ خەسەو بۊن.

 وەپای داتایەیل دەسەگە، 11 زەویلەرزە هازەیلیان لە ناوەین 3 و 3.9 پلە بۊە لەبان پەیمانەی رێختەر، لە وەختیگ 7 زەویلەرزە رەسینە ناوەین 2 و 2.9 پلە، و دوو زەویلەرزەی سووک توومار کریان کە لە ناوەین 1 و 1.9 پلە بۊە، وە بی ئەوەگ بوودە مدوو زەرەدیگ

شارەزایەیل ئی چالاکیە گلەو دان ئەرا کەفتن ناوچەگە لەناو پشتین زاگرۆس زەویلەرزەیی، کە لەبان دریژایی سنوورەیل عراقی – ئیرانی دریژەو بوود، و وە یەکیگ لەو ناوچەیلە هەژمار کریەێد کە فرەترین گورجی زەویلەرزەیی لە خوەرهەڵات ناوڕاس دیرن.