ئه‌كاديميه‌يل و رووشنهويره‌يل مسری له په‌ياميگ ئه‌را سه‌ركرده‌و وه‌رپرسه‌يل كوردستان ك(شه‌فه‌ق نيوز)ئاگاداری بوی، وتنه: ئيمه بڕيگيم له رووشنهويره‌يل مسری و گرينگده‌ر وه كيشه‌ی كوردستان و ئه‌زموونه‌يل كورد ئه‌را ماوه‌ی چاره‌كه سه‌ده‌يگ، ك له‌و ماوه هه‌رێم تويه‌نست گرفته‌يل فريه‌يگ بخاده كنار تا ره‌سيه ئی قوناغه و هه‌رێم كوردستان بويه شونيگ پڕ ئاسايش و مايه‌ی سه‌ربه‌رزی ئه‌را گشتلايگمان.
رووشنهويره‌يل مسری له كووتايی قسه‌يليان هه‌ميش وتن: ئيمه فريه نگه‌رانيم له‌بار هه‌رێم و قه‌سه‌مدان ئه‌يه‌يم وه‌گيان گشت ئه‌زيزه‌يليدان سه‌رمان نه‌چه‌منين، چوينكه ئيمه ئی په‌يامه له خوه‌شه‌ويسی و ئه‌زره‌ت خاسيگه‌و ئاراسته‌ی ئيوه‌ی ئه‌كه‌يم و خودا خوه‌ی پشتگير سه‌ركه‌فتنه.
جی باسه، ئه‌و په‌يام رووشنهويره‌يل مسريه ئمزای هه‌ر يه‌ك له‌يانه گرته‌سه خوه‌ی، ك پيكهاتنه له: دكتۆر سعده‌دين ئبراهيم مامۆستای كومه‌ڵايه‌تی سياسی له زانكۆی ئه‌مريكی و سه‌رۆك بنگه‌ی ئبن خه‌لدون، رجائی فايد نويسه‌ر و له‌يه‌كه‌وده‌ر سياسی سه‌رۆك بنگه‌ی مسری ئه‌را خوه‌نين و توێژينه‌وه‌ی كوردی، محه‌مه‌د حه‌سه‌ن ئه‌لبه‌نا نويسه‌ر رووژنامه‌نويس سه‌رۆك رووژنامه‌ی وه‌رين ئه‌لئه‌خبار، عه‌لی به‌درخان هونه‌رمه‌ند و دراوه‌ر سينه‌مايی، دكتۆر مه‌حمود زايد مامۆستای مێژوو له زانكۆی ئه‌زهه‌ر.