عەبدولسەلام مەدەنی وەڕیەوبەر جیوەجیکەر دامەزراوەگە ئەرا ئاژانس شەفەق نیوز وت: هویرکردن سەرەکی لەی پڕۆژە لەوەر دوو هووکار هات، یەکەمیان نواگردن ئاڵشتبوین کەشوهەوا و هاندان کشتوکاڵی چوینکە عراق ویەگیگ لەو دەوڵەتە تورتەیلە لەنوای ئاڵشتبوین کەشوهەوا دانریەێد، و دویەم هووکار هەمەڕەنگکردن سەرچەوەیل داهات، و ئی پڕۆژە گرنگیدان وە کشتوکاڵی کەێدە ئامانج ئەرا دابینکردن دەرفەتەیل کار زیاتر ئەرا گەنجەیل.

لەلای خوەییش، بێگەرد تاڵەبانی خانمە وەزیر کشتوکاڵی لە حکومەت هەرێم کوردستان لە کۆنگرەیگ رووژنامەوانی وت: ئی پڕۆژە لە پڕۆژەیل گرنگە ک وەگەرد گرنگیدان وە کشتوکاڵی هەمیش گرنگی وە ئابووری دەێد، وە ناڵیم دارەیل بەردار.

وتیش؛ کشتوکاڵی یەکیگە لە کەرتەیل گرنگ لە هەرێم کوردستان، و ئەرا گەشەپیدان ئی کەرتە پشتگردن ویەک نووڕین ناوبەین حکومەت هەرێم کوردستان و حکومەت فیدڕاڵی خوازیمن.

وەپەی دامەزراوەگە، ئی پڕۆژە بەشیگە لە پڕۆژەی بیناکردن توانای خوەیڕاگری ئەرا قایمکردن ئاسایش خوەراک عراقی، ک دامەزراوەگە وە هاوبەشی وەگەرد بەرنامەی خوەراک جەهانی  WFP وە سپۆنسەر حکومەت ئەڵمانیا جیوەجیی کەێد.

پڕۆژەگە وە سێ گام تەواو بوود، ک یەکەم گامی تەواو بوی، لە دروسکردن سێ پانێڵ کار ئەرا بیناکردن توانای لایەنەیل حکومەتی پەیوەندیدار وە کشتوکاڵی و دارسان لە پارێزگایل هەولێر و سلێمانی و دهۆک تا وەڕیەوبەرایەتیەیل ژینگەی حکومەتی زانستنیگ خاستر لە کاربۆن بیاشتان، وەگەرد ئیدارەی سەردەمیانەی دارسانەیل.

گام دویەم، ک ئیرنگە جیوەجی کریەێد، ک وەهاوکاری زانکۆی سەڵاحەدین ٥ هەزار دار لە رووبەر ٢٦ دۆنەم لە کولێژ کشتوکاڵی دانریەێد، وە تەکنیکgroassis waterboxx، ک ئاوەگە لەناو سەندووقیگ گردەو بوود، تا وەشیوەیگ ئابووریانە و زانستی بڕەسێدە ریشەی نەمامەیل، تا هەڵم ئاوەگە نەهڵسێد، و هەر یەک مانگ تەنیا ١٥ لەتر ئاو وەیەک جار خوازێد.

 دامەزراو رەوانگە هەمیش ئویشێد؛ گام سێیەم وە کاڵین ٣٠ هەزار دار وە خود سیستەم لە هەولێر پایتەخت هەرێم کوردستان جیوەجیی کریەێد.

ئەو دارەیلە ٤٠٠ دار ئەنجیر، و ٦٣٠ دار ئەنار، و ١٧٠٠ دار لەیموەن و پرتەقاڵ، و ٣٦٠ دار زەیتون ئیسپانی، و ١٦٤٠ دار گەز لەناوی بوی.