شەفەق نیوز/ وەزیر پەروەردەی هەرێم کوردستان، ئالان حەمە سەعید، ئمڕوو یەکشەممە، دیاریکرد هاتێ خوەنەواری ئمساڵ وە نەکەفتن بیریەێدە قەڵەم لەوەر بایکۆت مامووسایەیل لە بڕیگ ناوچە و شارەیل هەرێم.
ئالان لە کۆنگرەیگ رووژنامەوانی کە ئمڕوو وە بوونەی یاد رووژ ئاڵای کوردستان سازکریا و ئاژانس شەفەق نیوز ئامادەبوی راگەیان، "دەوام وەشیوەی تەواو لە سەرانسەر کوردستان دەسوەپی نەکردیە وە مدوو بایکوت مامۆسایەیل لە شمارەیگ ناوچەی هەرێم کە بریتین لە :پارێزگای سلێمانی، و پارێزگای هەلەبجە، هەردوگ ئیدارەیل سەروەخوەیل گەرمیان و راپەرین لەوەر وەرنەگردن مووچە و شایستەیل داراییان".
وتیش "حکومەت هەرێم و وەزارەت پەروەردە لە گفتوگوکردن وەردەوامن وەرد حکومەت بەغدا باوجی نەڕەسینەس ئەرا هویچ چارەسەریگ".
ئاشکەرایکرد " چەن رووژیگ ئەرا دەسوەپیکردن تاقیکردنەوەیل نیمەی ساڵ مەنییە، هاتێ تاقیکردنەوەیل دویابخەیمن یانیش ساڵ خوەنینەگە وە نەکەفتن هەشماربکرێد ئەگەر گیچەل بایکۆت چارەسەر نەکرێد".