شەفەق نیوز/ ئەرا رووژ دویەم لەبان یەک، ناڕەزایی رانندەیل تەکسی لە پارێزگای سلێمانی لەبان گرانی نرخ سوتەمەنی وەردەوامە.  

پەیامنێر ئاژانس شەفەق نيوز لە سلێمانی وت: رانندەیل تەکسی، ئەرا دویەم رووژ لەبان یەک، ناڕەزایەتی کردن وری سلێمانی-تاسلووجە بڕین، ئەوەیش لەبان گرانی نرخ بەنزین لە سلێمانی.  

ناڕەزایلە داوای دیاریکردن نرخ یەک لیتر بەنزین وە ٥٠٠ دینار کردن، و بڕیگیش رەخنە لە بیدەنگی لایەنەیل حکومەتی لە داواکاریەیلیان کردن ک یە دوو رووژە ئاشکرا کریانە، و دووپات لە وەردەوامی ناڕەزایییان کردن تا ئەوەنە داوایلیان جیوەجی کریەێد.       

لە مانگ گوزەشتە، هەمیش رانندەیل تەکسی لە سلێمانی و ئیدارەی گەرمیان لە هەرێم کوردستان، ناڕەزایی ئەرا چەن رووژیگ کردن، لەبان گرانی نرخ سوتەمەنی.     

لەبان ئەو ناڕەزایییەل وەردەوامە لەلایەن رانندەیل تەکسی لە سلێمانی و ئیدارەی گەرمیان و راپەڕین،  باوجی نرخ سوتەمەنی وەردەوامە لە بەرزەوبوین،  تا نرخ یەک لیتر بەنزین (عادی) ئمڕوو رەسیە ١٠٠٠ دینار،  و (موحەسەن) ١١٢٥ دینار، و (سوپەر) ١٢٠٠ دینار.   

رانندەیل رخیان لە دووارەبوین سیناریۆی ساڵەیل گوزەشتە چوود ک لە وەرز تاوسان نرخ سوتەمەنی گرانترەو بوود، ک لەوی وەرزە سوتەمەنی زیاتد وەکار تیەێد، و دی مردمەگە نیەتوەنن کرای تەکسی بیەن.