شەفەق نیوز - هەولێر

لە هەرێم کوردستان، ئمڕوو سێشەممە، خەوەر دریا لە راگەیانن "پەیماننامەی راگەیانن ئەرا ژینگە"، وە ئامانج زیایکردن هەماهەنگی لە ناوەین دەسە و ریخریاگەیل ژینگەیی لە لایگ، و دامەزراوەیل راگەیانن لە لایگ ترەک.

مەعروف مەجید، سەرۆک ریخریاگ "ئاییندە" ئەرا پاریزگاری ژینگە، لە رێوڕەسمەیل راگەیانن پەیماننامەگە وت، کە "ژینگەی هەرێم کوردستان رۊوەڕۊ قەیرانیگ ریشەیی بوود وە مدوو ئاڵشتکاری کەشوهەوا، و هشکەساڵی، و فەرامووشکردن، و جیماگەیل پیشەسازی، و رخباری لەناوچگن سامانە سروشتییەیل و ئاژەڵەیل کۊیی".

هەمیش وت کە "دامەزراوەیل راگەیانن لایەنیگ کاران لە دروسکردن و ئاراستەکردن هوشیاری گشتی، و لەی خاڵەو ئی پەیماننامە ئەخلاقی و پیشەییە راگەیەنییمن چۊ سەرەتایگ ئەرا خزمەتکردن ژینگەی نیشتمان، وە هاوبەشی لە ناوەین سەندیکای رووژنامەنویسەیل کوردستان، و ریخریاگ (ئاییندە)، و گشت دامەزراوەیل راگەیانن بەشدار، ئەرا هەڵگردن وەرپرسیاریەتی میژووییان لە وەرانوەر خاک و بانان وڵاتەگە".

دیاری کرد کە "پەیماننامەگە لە شەش مادە تیەێد کە لایەنە جیاجیاگان ژینگەیی لەخوەی گرێد، کە مادەی یەکەم دیاری کەێد کە (ژینگە لەپیشینەیگ نیشتمانییە)"، وتیش کە "دامەزراوەیل راگەیانن وەپای پەیمان دەن کە دۆسیەی ژینگەیی لە تەقەلایەیل لاوەکی یا رەدبۊ ئاڵشت بکەن ئەرا لەپیشینەیگ کۆمەڵایەتی و نیشتمانی سەرەکی، وەگەرد تەرخانکردن ماوەیل وەخت خوازیاگ وە رێک و پێکی ئەرا هوشیارکردن و داپووشین پرسەیل ژینگەیی".