شەفەق نیوز/ ئمڕوو سێشەممە، زانکۆی سلێمانی یاد 127 ساڵەی دامەزرانن رووژنامەگەری کوردی کرد، وە ئامادەبوین شمارەی فرەیگ لە ئەکادیمیست و پسپۆڕەیل و پیشەگەرەیل راگەیانن و رووژنامەنویسەیل، لەناویان ئاژانس شەفەق نیوز.
بەرهەم خالید، ئەندام دەسەی سەرپەرشتیاری ئاهەنگەگە ئەرا ئاژانس شەفەق نیوز وت: زانکۆی سلێمانی ساڵانە ئی بوونە لە چوارچیوەی پرۆگرامە ئاساییەیلی ساز کەێد، وە ئامانج رووشنکردن لەبان میژوو دویرودرویژ رووژنامەگەری کوردی و رەسانن پەیام و میژووەگەی وە خوەنەوارەیل و ئەکادیمیستەیل، و پیشەگەرەیل راگەیانن.
خالد وتیش: "ئامانج ئاهەنگەگە باسکردن دیدگا و پیشنیازە ئەکادیمییەیلە کە رینمایی رێڕەوی کار رووژنامەوانی و وەنوابردنی وەرەو ئاستیگ خاستر و پیشەییتر و هاوسەنگبوین وەرد پیشهاتە سەردەمییەیل و مقیەتیکردن ناسنامەی میدیایی کوردی".
وتیش: ئاهەنگەگە پێشانگایگ تایبەت فۆتۆگرافی لەناوی بوی کە وینەی دەگمەن و بەڵگەنامە ئەرشیفییەیل میژوو رووژنامەگەریی کوردی لەناوی بوی، دەرفەت وە ئامادەبویەیل وەخشی ئەرا نووڕستن زاقترین وێستگەیل رووژنامەگەری لە ماوەی سەدەی گوزەشتە.
هەرلیوا بەرنامەگە سیمیناریگ زانستی لەناوی بوی لەبان "گەشەپیدانەیل میدیا و زیرەکی دەسکرد"، کە لەلایەن شمارەیگ ئەکادیمی پسپۆڕەو پیشکەشکریا.
خالد ئاشکرا کرد کە سیمینارەگە رووشنایی خستە بان گرنگی سوودوەرگردن لە تەکنەلۆژیای زیرەکی دەسکرد ئەرا پەرەپیدان میدیای نوو، و باس ڕێبازە ئەکادیمیەیل کرد سەبارەت لە وەکارهاوردن ئی تەکنەلۆجیا وەشیوەیگ کە خزمەت وە ئەرک مرۆیی میدیا بکەێد، وەتایبەتی لەوەر رووشنایی ئەو سەختیەیلە گەورە لەڕوی میدیای دیجیتاڵی هاوچەرخ.
لە کۆتایی ئاهەنگەگە مەراسیمیگ ئەرا ڕێزلێنان لە سمارەیگ دامەزراوەی راگەیانن سازکریا جویر پێزانین ئەرا تەقەلای رەسانن راسیەیل و خزمەتکردن کۆمەڵگا. لە ناو ئەو لایەنەیلە کە ڕێزیان وەپییان دریا، ئاژانس شەفەق نیوز بوی، ئەرا ڕۆڵ دیار و وەرچەوی لە کار رووژنامەوانی و میدیایی.