عەقید ماف پەروەر قەدوری لە کۆنگرەگەی ئمڕووی کە ئاژانس شەفەق نیوز ئاگاداربوی راگەیان، داواکریاییگ فەرمان دەسگیرکردن لەبانی دەرچگە وەپای مادەی 443 لە یاسای سزادان عراقی شمارە 111 ساڵ 1969، کە خاوەن پێشینەی تاوان دزیە، وە بڕیار  دادوەر لێکۆڵەر قەزای کەلار و وە رەزامەنی دادوەر لێکۆڵەر قەزای قورەتوو، مەفرەزەیگ دژە تاوانەیل رەسینەس ئاوای "ساڵح ئاغا" ئەرا جیوەجیکردن فەرمان دەسگیرکردن توومەتبار.

هەنای مەفرەزەیل رەسینە دوینن توومەتبارەگە وە تەنیا نییە، پەنج کەس تریش ها وەگەردیا، خوەی وە دەسەو نەدایە،  رویوەروی ئەو مەفرەزەیە بویە وە چەک سووک و دەوانچە و کلاشینکۆف، هەمیش وە نارنجەک، دیاریکرد تەقیان ئەو بۆمبە بویەسە هووکار زەخمداربوین ودوو ئەفسەر و ئەندامیگ پۆلیس.

عەقید مافپەروەر وتیش، توومەتبارەیل سوود لە سرووشت و جوگرافیای ناوچەگە وەرگردنە ئەرا پەلامارداین و زەخمداریکردن ئەندامەیل پۆلیس، وتیش هێزەیل پۆلیس دەسنانە وەبان ماشینیگ و دوو ماتۆڕسکیل، ئۆپراسیۆن کوڵەوشکین و پەیاکردن دەسوەپیکریایە ئەرا دەسگیرکردن ئەو تاوانبارەیلە.