شەفەق نیوز/ پارت دیموکرات کوردستان، ئمڕوو پەنجەشممە، یاسای پەککەفتن دارایی وەجیا لە هێزە کوردیەگان رەتکرد وداناگەی جوور تۆڵەسەندنەوە ک ئامانج هەڵبژاردندی ناگونجیاگ و دویر لە رێککەفتنەیل دارایی لەناوبەین حکومەت هەرێم و حکومەت فیدڕاڵی هالە پشتی، وهەمیش فراکسیۆن گۆڕان رەخنەی وناوهاوردن فەرمانبەرەیل هەرێم ئەرا ناکۆکی وململانەگان لەناوبەین بەغداد و هەولێر کرد.
پەرلەمانتار بەشار کیکی جیگر سەرۆک فراکسیۆن پارت دیموکرات کوردستان لە ئەنجومەن نوێنەران عراق ئەرا ئاژانس شەفەق نیوز وت: داوای رەوانەکردن ٣٢٠ ملیار دینار مانگانە تا ماوەی سێ مانگ ئەرا حکومەت هەرێم کوردستان کردیمن ک بخریەێدە ناو رێککەفتنەگە تا ئەوەنە بوودجەگە بڕیار دریەێد، بەڵکم هێزە سیاسیە شیعەگان ئەوە رەتکردن و پەڵپ رەوانەکردن داهاتەیل مانگانەی نەفت هەرێم گردن وهەمیش رەوانەکردن داهاتەیل مەرزە سنووریەگان وەتەواوی وەگەرد پرسیارکردن یاسایی ئەگەر ئەی مەرجەیلە وجی نەهاوریان، و ئەوەیش هێزە کوردییەگان رەتی کردن.
و دووپاتکرد ک حکومەت هەرێم کتاویگ فەرمی ئەرا حکومەت فیدڕاڵی ئاڕاستە کرد وە جیوەجیکردن رێککەفتن بەغداد- هەولێر ئەرا داین داهاتەیل ٢٥٠ بەرمیل رووژانە وەگەرد نیم داهاتەیل مەرزە سنووریەگان لە بوودجەی هاتگ ساڵ ٢٠٢١ .
وتیش؛ کورد وەزۆرینە دەنگ لەبان یاسای پەککەفتن دارایی نەیان، و لە دانیشتنەگە دەرچگن، و مەزەنە لە هێزە شیعەکان لەی توندی سیاسیە وەگەرد کورد نەکردیمن ئەرا ئمانجەیلیگ هەڵبژاردەیی و ئەژندەیلیگ دژایەتی زاقتریان رێککەفتن شەنگال بوی ئەرا جەختکردن لەبان کورد لە لاییگ و کازمی لەلاییگ تر ئەرا رازیکردن جادەگە و خستن قەیرانەگان لەبان مەیدان هێزە کوردەگان، ئەو کارەیلە ک هوکارەیان بویمنە.
کیکی وتیش؛ هەوڵدایمن بڕەسیمنە رێککەفتن وەگەرد هێزە سیاسیەگان و پابەندیمن وە جیوەجیکردن رێککەفتنەگان وەگەرد حکومەت فیدڕاڵی، و رازی بویمن داهاتەیل نەفت و مەرزە سنووریەگان بیەێمنە حکومەت فیدڕاڵی، بەڵکم مەرجەیل بەشیگ لە هێزەگان جوور تۆڵەسەندنەوە بوی.
لەلای خوەییش غالب محمد نوێنەر فراکسیۆن گۆڕان دووارەی رەتکردن وەناوهاوردن مووچە و مافەیل فەرمانبەرەیل ئەرا ململانە و ناکۆکیەگان لەناوبەین بەغداد و هەولێر کرد، ودووپاتکرد لە گرنگی داناین مووچەی فەرمانبەرەیل هەرێم لەناو یاساگە دویر لە هەر پەڵپەیلیگ تر.
محمد ئەرا ئاژانس شەفەق نیوز وت: فرەجار داوای جیگرکردن مووچەی فەرمانبەرەیل هەرێم لەلایەن حکومەت فیدڕاڵی کردیمن جوور بەشیگ لە فەرمانەبەرەیل عراق، وتیش: ناکۆکیەگان وە دانووستان یا شیوەیل یاسایی و دادوەری چارەسەر کریەن، دویر لە نان و خوەراک کەلەگە.