شەفەق نيوز/ لایەنەیل تەندروسی و ڤێتێرنەری لە هەرێم کوردستان، ریکارەیلیان تونەو کردن، دویای توومارکردن یەکەمین تویشهاتن وە تەو خوینوەربوین لە هەرێم، و داوا لە هاوڵاتەیەیل و خاوەن کوشتارگەیل کرد وە تونی پابەند بوون وە رینمایەیل تەندروسی، و هوشداری لە ئەنجام سووکایەتیکردن وەو ریکارەیلە دان.
پزشک کاوە دزەیی یەکێک لە پسپۆڕەیل تەندروسی ئاژەڵ ئەرا ئاژانس شەفەق نیوز وت: لایەنەیل پەیوەندیدار گشت ساڵیگ داوا لەلییان کریاس بەرنامەی کوتان واکسین تەو خوینوەربوین ئەرا ئاژەڵەیل جیوەجی بکەن.
دووپاتیش لە گرنگی پرشانن تەویلەیل وە دەرمان دژوە هەڵگرەیل بیماری جیوەجی بکەن، و تەمیسکردن کوشتارگەیل فرە گرنگە ئەرا کۆنتڕۆڵکردن ڤایرۆسەگە و نواگیریکردن بڵاوبوینی، و بایەسە قەیەغەی بڕین ئاژەڵ لە دەیشت کوشتارگەیل فەرمی بکریەێد، چوینکە ئەو کارەیلە وەشیوەی گەورەیگ دەسمیەتی لە بڵاوبوین بیماریەگە دەێد.
لەباوەت ئەو ریکارەیلە کە هاوڵاتیەیل ئەرا مقیەتیکردن خوەیان بکەن، دزیەیی وت: بایەسە مەردم وەرد ئاژەڵەیل تیکەڵ نەوون، و گووشتیک نەسینن لە کوشتارگەی نافەرمی بڕیاس، چوینکە شایەت ئی گووشتە پیس بوود و رخیگ لەبان تەندروسییان دیرێد.
باس ئەو بیماریە وە فرە رخدار کرد و وت: تا ئیسە چارەسەرییگ دیاریکریای ئەرای نییە، و بوودە مدوو خوینوەربوین ناوین کە هاتێ بڕەسێدە مردن ئەگەر زویوەزوی چارەسەری نەکەێد، و توانیمن بویشیمن چەنە رخداری کۆڕۆناس ئەگەر کۆنتڕوڵ نەکریەێد.
وتیش: یە دەیان ساڵە بیماریەگە ناسیاس، وەتایبەت لە ناوچە گەرمەیل لە ئەفریقیا، هەمیش لە ئەمریکا و بەشیک لە دەوڵەتەیل هەس، وەلێ وەکارهاوردن واکسین لەو دەوڵەتەیلە دەسمیەتی لە کەمەوکردن رێژەی بڵاوبوینی ئەرا نزیکەی پەنجا تا شەس لە سەد داگە.
هەرلیوا، پەیامنێر ئاژانس شەفەق نیوز وەگەرد بەشیک لە قەساوەیل لە هەولێر قسە کرد، کە دووپات لە گرنگی پابەندبوین وە ریکارەیل تەندروسی و بڕین لەناو موسنارگە مووڵەتدار کردن.
ئەحمەد، قەساوە، وت: بڕین لە دەیشت کوشتارگەیل تاوانە وەبان تەندروسی گشتی، کە ئەو گووشتە کە وەلایەن وەزارەت تەندروسی موهر دریەێد تەنیا ئەوە دڵنیا و بیوەیە، ئەراوە ئیمە داوا لە هاوڵاتیەیل کەیمن هویچ کووشتیگ لە سەرچەوەیگ نەناسیای نەسینن.
قەساویگ ترەک وەناو دڵشاد هاوڕای بوی، کە وت: دەسەڵاتەیل کار خوەیان کەن، وەلێ وەرپرسیارێتی کەفێدە مل قەساوەیل و خاوەن ئاژەڵەیل، کە مقیەتیکردن تەندروسی وەرپرسایەتییگ هاوبەشە.
لەسای ئی کارەیلە، وەزارەت تەندروسی لە هەرێم کوردستان دووپات کەێد کە ئەوەسا هەڵمەتەیل وەشکین و چەودیاریکردن خەسەو کەێد، و ریکارەیل نواگیریکردن لەبان هەر کەسیگ جیوەجی کەێد کە ریکارەیل شکنێد، و داوا لە هاوڵاتیەیل کرد هاوکار بوون، و ئاگاداری لەبان بڕین هەڕەمەکی لە دەیشت کوشتارگەیل توومار بکەن.