شەفەق نیوز- دهۆک

وەڕێوەبەر فەرمانگەی کووچ و کووچبەرەیل لە دهۆک، بیر دیان جەعفەر، ئمڕوو دوشەممە، گلەودان نزیکەی 130 خێزان ئێزیدی لە کەمپ شاریا لە باکوور پارێزگاگە ئەرا ناوچەیل  خوەیان لە قەزای شەنگال راگەیان، لەناو بەرنامەی گلەودان ئارەزوومەندانە کە رێکخریاگ ناودەوڵەتی ئەرا کووچ چاودێری کەێد.

جەعفەر، ئەرا ئاژانس شەفەق نیوز وت:  70 خێزان ئمڕوو، کەمپ شاریا وەجی هێشتن و روی کردنە شەنگال، و دیاری کرد، بڕیارە 60 خێزان ترەک سوو کووچ بکەن، تا بڕ گشتی خێزانەیل گلەوخواردگ برەسێدە 130 خێزان.

ئاشکرایکرد، ئی خێزانەیلە لە ناوچەیل خوەیان لە ساڵ 2014 ئاوارە بوین، و زیاتر لە 12 ساڵ لە کەمپەیل ئاوارەیی لە هەرێم کوردستان وەسەر بردن، و  گلەودانیان وە ئیرادە و هەڵوژاردن خوەیان بوی، وە هەماهەنگی لە ناوەین رێکخریاگ ناودەوڵەتی ئەرا کووچ و حکوومەت هەرێم کوردستان و وەزارەت ناوخوەی و وەڕێوەبەرایەتی کووچ و کووچبەرەیل و ئیدارەی قەیرانەیل.

دیاریکرد  ئەرا وەردەوامی تەقەلایەيل  گلەودان ئاوارەیل ئەرا ناوچەیل  خوەیان، و دابینکردن هەماهەنگی و ئاسانکاری هەوەجەکریاگ ئەرا سەرکەفتن پرۆسەیەیل گلەودان ئارەزوومەندانە.