شەفەق نیوز/ کۆمسیۆن باڵای سەروەخوەی هەڵوژاردن لە دهۆک و سلێمانی، ئمڕوو جمعە، دووپات کردن کە دەنگدان تایبەت لە هەڵوژاردن پەرلەمان هەرێم کوردستان، وەشیوەی خاس و ئاسوودە وەڕیەو چوود، و تا ئیسە هویچ پێشێلکارییگ توومار نەکریاس، لەناو گەشبینی لە بەرزەوبوین ئاست بەشداریکردن.

دەنگدان تایبەت هیشت ری بیەێدە هیزەیل ئەمنی جویر پیشمەرگە و ئاسایش تا دەنگ لە هەڵوژاردن بیەن وەرجە دەنگدان گشتی.

خالد عەباس وەڕیەوبەر نویسنگەی کۆمسیۆن هەڵوژاردن لە دهۆک ئەرا ئاژانس شەفەق نیوز وت: لە ساعەت هەفت شەوەکی ئمڕوو جمعە دەسکریا دەنگدان تایبەت، کە ٣٣ بنکەی دەنگدان لە ناوچەیل جیاجیای پارێزگاگە بەشەو کریانە، کە ١٤٠ ویستگەی دەنگدان هاناویان.

دیاری کرد کە شمارەی دەنگدەرەیل تایبەت لەی هەڵوژاردنە رەسێدە 40895 دەنگدەر، کە لەناو لیست دەنگدان دهۆک توومار کریانە.

عەباس دووپات کرد کە ئامێرەیل دەنگدان لە گشت بنکەیل خاس کار کەن، و کۆمسیۆن شمارەی خاسیگ لە ئامێرەیل پشتدەسە ئامادە کردیە، تا ئەگەر گیچەڵیگ ناکاوی بوود وەکاریان بارێد.

لە پارێزگای سلێمانی، پەیامنێر ئاژانسمان دووپات کرد کە شمارەی دەنگدەرەیل رەسیە 76,661، وەبان  57 بنکەی دەنگدان بەشەو بوینە، وە 276 ویستگەی دەنگدان.

وتیش: تەکنیکەیل نوویگ هاوریاس، جویر کارت بایۆمەتر، کە ئەرا یەکەمین جارە لە میژوو هەڵوژاردن هەرێم کوردستان وەکار باێد، ئەراک مسۆگەرکردن پاکی دەنگدان و دەسکارینەکردن وە لیست دەنگدەرەیل.

کارزان محمد کە چەودیاریکردن دەنگدان کەێد، ئەرا ئاژانس شەفەق نیوز وت: هاوردن کارت بایۆمەتری کاریگ چوینیەتیە وەرەو وەردەم لە دەنگدان،کە دەسمیەتی لە بەرزکردن ئاست ئاشکرایی کەێد و کەمەوکردن دەرفەت دەسکاریکردن ئەرا خوارترین ئاستی.

لەناو دەنگدان تایبەتر یەکیگ لە دەنگدەرەیل کە ناو خوەی ئاشکرا نەکرد، ئەرا ئاژانس شەفەق نیوز وت: هەس کردم دەنگم گرنگە مو مقیەتیی کریاس، و رێکوپێکی لە بنکەگە خاس بوی، و گشت چشتیگ وەخاسی وەڕیەو چگ، هەر لە  وەشکین ئەمنی تا دەنگدان.

ئەندامیگ ترەک ئەرا پەیامنێرمان وت: ئیمە هایمنە ئیرا ئەراک خزمەت و مقیەتیکردن هاوڵاتیەیل، و ئمڕوو کە دەرفەت بەشداریکردن لە بڕیاردان چارەنویس هەرێم کەفێدە دەسمان وە هەڵوژاردن، و وەکارهاوردن کارت بایۆمەتری، چشتیگ لە ئاشکرایی و بڕوایی خستە ناوی کە چەوەڕیی کردیایمن.

پەیامنێر ئاژانس شەفەق نیوز دووپات کرد کە کۆمسیۆن باڵای سەروەخوەی هەڵوژاردن بڕیگ لە ریکارەیل ئەمنی جیوەجی کرد ئەرا مسۆگەرکردن دەنگدانیگ بی کیچەڵ.

 پەیامنێرمان وتیش: وەناوبردن مۆبایل ئەرا ناو ویستگەیل دەنگدان قەیەغە کریا، ئەرا مسۆگەرکردن نهێنی دەنگدان، و دەسکارینەکردن و نەهیشتن کاریگەری وەبان دەنگدەرەیل.

 رۆماڵیگ راگەیانن فراوان 

ئەرا مسۆگەرکردن رۆماڵیگ راگەیانن هویرد و راسگۆ، کۆمسیۆن هەڵوژاردن چوار بنکە ئەرا ڕاگەیانکارەیل لە سلێمانی دیاری کرد، تا رووژنامەنویسەیل و پەیامنێرەیل بتوەنن دەنگدانەگە لە نزیکەو رۆماڵ بکەن.

  گەشبینی لە بەرزەوبوین ئاست دەنگدان 

فرە لە چەودیاریکەرەیل باس گەشبینی خوەیان کردن لە ریژەی بەشداریکردن لە دەنگدان تایبەت، وەتایبەتی لە سای ئی رێکخستن خاسە و ریکارەیل ئەمنی.

تەرزە تەها یەکیگ لە چەودیاریکەرەیل ناوخوەیی ئەرا پەیامنێر ئاژانس شەفەق نیوز وت: ئاشکراس کە ئەو رێکخستن هویردە کە ئی دەنگدانە وەخوەی دی، وە شیوەی خاسیگ شکیەێدە بان مۆڕاڵ دەنگدەرەیل و بڕوایان وە هەڵوژاردن.

وتیش: ئەوەگ ئمڕوو لە سلێمانی دیمنەر ئارەزوو هیزەیل ئەمنی لە بەشداریکردن لە نەخشەکیشان بانان هەرێم نشان دەێد، و پابەندییان وە جیوەجیکردن گشت ریکارەیل کە پاکی دەنگدانەگە مسۆگەر کەن.

پەیامنێر ئاژانس شەفەق نیوز دووپات کرد کە دەنگدانەگە لەژیر چەودیاریکردن ناودەوڵەتی و ناوخوەیی هویردیگ وەڕیەو چوود، وەگەرد تیمەیل چەودیاریکردن دەنگدانەگە لە وەخت وازکردن بنکەیل.

وتیش: ئەو سەختی و گیچەڵەیلە کە لە ساڵەیل گوزەشتە کەفتنە روی هەرێم کوردستان، هیشت ئی هەڵوژاردنە بوودە مەوقەیگ یەکلاییکەر، و ئەو کەشوهەوا کە ئمڕوو دیمنەی، مەزەنەیلمان وە بەرزەوبوین ریژەی بەشداریکردن زیای کەێد.