شەفەق نیوز- دهۆک
وەڕێوەبەر فەرمانگەی کووچ و کووچبەرەیل و وەڵامداین قەیرانەیل لە پارێزگای دهۆک، پیر دەیان جەعفەر، ئمڕوو یەکشەممە، خەوەردا لە ئامادەیی، ئەرا گلەوداین 410 خیزان ئاوارە لە ئۆردگایەیل پارێزگاگە و ئیدارەی سەروەخوەی زاخۆ وەرەو ناوچەیەیلیان لە شنگال.
جەعفەر ئەرا ئاژانس شەفەق نیوز وت، کە ئامادەکارییەیل ئەرا گلەوداین ئاوارەیل وەرەو شنگال لە ساڵەیلیگەو وەردەوامە وە هەماهەنگی وەگەرد رێکخراو کۆچ نێودەوڵەتی، و پرۆسەی توومارکردن ئەرا کاروانە نووەگە لە سەرەتای مانگ ئەیلوول ئایندە دەسوەپی کەێد و تا مانگ حوزەیران لە ساڵ 2027 وەردەوام بوود.
هەمیش وت کە توومارکردن لە گامە وەرینەیل تەنیا لەبان شمارەیگ لە ئۆردگایەیل و ناوچەیلیگ دیاریکریاگ لە شنگال کوڵەو کریاد وەرجە ئەوەگ فەرمانگەی کووچ داوا بکەێد گشت ناوچەیل قەزاگە بگرێدە خوەی و وژاردەی گلەوخواردن لەوەرانوەر گشت ئاوارەیل ئارەزوومەن وە گلەوخواردن وەرەو ناوچەیەیلیان فەراهەم بکەێد.
دووپات کرد کە کاروانە نووەگە 410 خیزان گرێدە خوەی و توومارکردن لە گشت ئۆردگایەیلە بی جیاوازی وەردەس بوود، و لە ناوچە جیاوازەیل شنگالەو، و دەسنشان ئەرا ئەوە کرد کە تیمەیل پسپۆڕ پرۆسەی توومارکردنەگە وە هەماهەنگی وەگەرد ئیدارەیل ئۆردگایەیل گرنە مل تا وەخت تەواوبۊن شمارە دیاریکریایەگە.
جەعفەر دەسنشان ئەرا ئەوە کرد کە ریخریایەگە بڕ یەک ملیۆن و 500 هەزار دینار عراقی پیشکەش وە خیزانە گلەوخواردگەیل کەێد، وەگەرد گردنەمل خەرج بارکردن کەلوپەل ئەرا ناوچەیل گلەوخواردن، و دیاری کرد کە ئی بڕە پارەیلە لەلایەن ریخریاگ کووچ نێودەوڵەتییەو پیچکەش کریەێد و هیچ پەیوەندییگ وە وەخشینەیل یا قەرەبووەیلەو نەیریەێد کە شایەت حکومەت عراقی پیشکەشیان وە گلەوخواردگەیل بکەێد.
دووپاتیش کرد کە دەسخستن خیزانەگە ئەرا دەسمیەتی دارایی پیشکەشکریاگ لە ریخریاگە ناودەوڵەتییەگە لە ماف خوەی ئەرا دەسخستن قەرەبووەیل یا شایستە حکومییەیل لە ئاییندە بیبەشی نیەکەێد، و دووپات کرد کە شایستەیل گلەوخواردگەیل لە حکومەت عراقییەو وە شیوەیگ ئاسایی خەرج کریەێد هەر وەختیگ تەرخانکریاگەیل و کاش دارایی هەوەجەدار وەردەس بوود.
وتیش کە پرۆسەی پاڵپشتی گلەوخواردن کەمەوبۊنیگ وەخوەی دی وەراورد وە ساڵەیل گوزەشتە، کە ریخریاگ کووچ ناودەوڵەتی بەرنامەیل فراوانتریگ جیوەجی کرۆیاد کە نووەوکردن و دروسکردن ماڵەیل لە ناوچەیل گلەوخواردن لەخوەی گردیاد، لە وەختیگ پاڵپشتییەگە ئیسە تەنیا لەبان خەرج بارکردن و دەسمیەتی دارایی ئەرا خیزانە گلەوخواردگەیل کوڵەو کریەێد.