شەفەق نیوز - دهۆک

وەڕێوەبەرایەتی گشتی کاروبار مین لە پارێزگای دهۆک، ئمڕوو سێشەممە، وەردەوامبوین تیمەیل هەڵگردن مین و تەقەمەنی راگەیان لە کارەیل پاکسازی کێڵگەی مین لە ئاوایی بالندا سەر وە قەزای ئامێدی لە باکوور پارێزگاگە.

وەرپرس راگەیانن وەڕێوەبەرایەتیەگە، رێکار بیسفکی، ئەرا ئاژانس شەفەق نیوز وت: تیمەیل هەڵگردن مین وەردەوامن لە  کارەیلیان لە کێڵگەی بالندا A، و ئمڕوو توانینە مینیگ لە جویر V69 لەناو کێڵگەگە بکەنن.

وتیش؛  رووبەر  کێڵگەگە رەسێدە 100,095 مەتر چوارگۆشە، لە وەختیگ ئەو رووبەرە  تا ئیسە پاکسازی کریاگە رەسیەس 15,647 مەتر چوارگوشە،  نزیکەی 15 لە سەد لە رووبەرە گشتیەگە.

بیسفکی ئاشکرایکرد، تیمەیل تا ئیسە توەنستنە 26 پارچە لە مین و تەقەمەنی لەناو کێڵگەگە پەیابکەن و هەڵیان بگرنەو، لەناویان پەنج مین لە جویر V69، و 16 مین لە جویر Ts50، و دوو مین لە جویر VS50، و یەک مین لە جویر Vr40، و یەک مین لە جویر POMZ، بیجگە لە یەک  وەجیماگەی جەنگی نەتەقیاگ (UXO).

دووپاتکرد لە وەردەوامبوین کارەیل پاکسازی لە کێڵگەگە، و دیاریکرد تیمەیل وەردەوامن لە کارکردن لەبان پاکەوکردن رویبەرەیل مەنگ و لاوردن رخداریی مین و تەقەمەنی لەلیان.