شەفەق نیوز ــ دهۆک

دەسەی لێکۆڵیەوەو کووکردن بەڵگەی پارێزگای دهۆک، ئمڕوو یەکشەممە، راگەیان تیمیگ تایوەت 68 قەور وە کۆمەڵ لەکوو 162 قەورە وە کۆمەڵەیل و تاکەیل وازکردنە، کە رێکخریاگ داعش ئەنجامیداس وەرانوەر وە هاوڵاتی ئێزیدیەیل ناوچە جیاوازەیل قەزای شەنگار لە ماوەی ساڵ 2014.

نێچیروان سلێمانی، وەڕێوەبەر ئیدارەی دەسەگە، وە ئاژانس شەفەق نیوز وت، تەقەلایەیل وەردەوامن وە دەسمیەتی وەرد لایەنەیل ناوخوەیی و ناودەوڵەتی ئەرا وازکردن قەورەیل و دراوردن روفاتەیل و چەسپاننیان وە تاوان، دووپاتکرد ناسنامەی 293 کەس ناسریاگە و لە قەورسانیگ تایوەت لە قەزای شەنگال لە خاک نریانە، تا ئیسە روفات زیاتر لە 450 کەس وە نەناسریاگی مەنییە، و چارەنویس 2883 کەسیش  لە پێکهاتەیل ئیزیدی تا ئیسە نادیارە.

ئاشکرایکرد، "تیمیگ تایوەت وەردەوامن لە کارکردن لو بارودۆخ سەختە لەوەر سرووشت خاکەگەی و کەشوهەوا" هەوەجە وە پاڵپشتی تەکنیکی و لۆجستیکی زیاتریگ کەێد ئەرا زویکردن کارەگە و رەسین وە ئەنجام هویردیگ پۆلینکردن قوربانی و خێزانەیلیان".

لە وەرانوەر ئەوە، کەسوکار قوربانیەیل و بیسروشوینەیل داواکەن ئەرا زویکردن لە وازکردن قەورە وە کۆمەڵەیل کە مەننە و ئاشکرایکرد چارنویس رولەیلیان کە تا ئیسە لەژیر زەوی بی ناسنامەن".

سومەیە خەلەف، کە یەکیگە لە کەسوکار قوربانیەیل وە ئاژانسەگە وت، "3 ئەندام لە خێزانەگەی تا ئیسە بی سەروشویننن کە (باوگ و دوو براین)" ، دیاریکرد روفات یەکیگیانیش وەرگردیە و لە قورسان کوجو تایوەت وە قوربانیەیل دەس داعش لە شنگال لە خاک نریایە.

جەلال جاسم وت، ( کوڕیگ و دوو خوەشکی) ماوەی 11 ساڵە دیارنەمەننە، خێزانەگە هویچ زانیاریگ لە چارەنویسیان نەیرێد، وەبان سەردانکردنە دوارەیل ئرا فەرمانگەی تایوەت ئەنجامداین وشکین DNA ئەرا ئەندامەیل خێزانەگە.

وتیش، "هویچ چشتیگ نیەتوەنن بیجگە لە زانستن راسکانی ئەوەگ مردنە یا زینین".