شەفەق نیوز/ لە ناودڵ گەڕەک شۆرجە کە فرەی کوردە لە پارێزگای کەرکوک، فایق شەوکەت نادر داودی (داودە) لەبان کورسییگ لەناوڕاس جادەیل نیشێد، و  خوەرەگە زوور فرەیگ لەبان شیوە و دەموچەوی هاوردیە، شەکەتی وەپییەو دیارە، وەلێ  رازی نیە خوەی بەێدە دەس شەکەتی، چوینکە دەس گرێدە شانازیی و سەربەرزی  کە نیەلێد دەر وەرپرسەیل بکوتێد، یا بچوودە لایان وە داوای  چارەسەری ژنەگەی، کە تویش بیماری (شێرپەنجە) بویە، کە کاریگەری فرەیگ لەبانی داشتیە،  مینەی کەسیگ کەێد  لە وەرپرسەیل کورد لە ئیدارەی کەرکوک، یا حکومەت هەرێم کوردستان، یا حکومەت فیدراڵی دەسمیەتیی بیەێد تا خەرج چارەسەریی بەێد.

 هونەرمەن فۆلکلۆری کورد (داودە) هەناێ پڕتاڵەگەی کەێدە وەر، کە ئویشێد لە باوگ و باپیری بردیەسەی، 

  “زبوون و چاکەت” ئەرا ئاژانس شەفەق نیوز وت: “من لە ساڵ ١٩٤٦ لە شار کەرکوک لەداڵگبویمە، ژنیگ و پەنج مناڵ دیرم، کە گەورەترینیان هۆشیارە، هەر لە مناڵییەو فرە خوەشم لە گۆرانی کوردی و مەقامەیلی تیەێد، لە ساڵ 1952، دویای ئەوەگ لە پۆل شەشەم سەرەتایی بویم، بەشداری لە هەزاران ئاهەنگ کردمە، وە دەسەڵاتەیل پاشایەتی و کۆمارییەیل یەک لە دویای یەک دیمە، و گشت چشتیگ وەسەر وڵات و کەرکوک هاتیە، ئاڵشتبوین و چگن، منیش هەر وەردەوام  لە گورانی چڕین و پیشکەشکردن فۆلکلۆر عراقی و کوردی بویمە. 

وتیش: “فۆلکلۆر کوردی دەوڵەمەنە وە گورانی و مەقام، و هانە هویرمانم، و لە و هەزاران ئاهەنگەیل سویر  ژەنم و چڕم، و هەر لە ساڵ ١٩٥٢ەو تا ساڵ ئیسەی ٢٠٢٤، یەیش پیشکەشە لە خودا، لە خوەشی و گورانی و فۆلکلۆر زیاتر نیەزانیمن”. زانیمن هەر سوریگ عەرەبی چە خوازێد، ئیمە سەمای عەرەبی ئەرای ژەنیمن، هەمیش ئەرا تورکمان و مەسیحییەیلیش وەیجویرە، ئیمە میراتی گشت نەتەوە و ئایینەیل هالامان و ئەرا خوەشی و دووسی  کەیمنەی”.

 داودە گڕیگ بیدەنگەو بوی، و ئەسر لە چەوی رشیا، هەناێ باس خیزانەگەی کردیمن، ئیجا وت:  ژنەگەم تویش بیماری  شێرپەنجە هاتیە، و پویل چارەسەرکردنی نەیرێد، کەسیش وەڵامی نیەێدەو، و لە ری ئاژانس شەفەق نیوز پەیامیگ ئەرا پارێزگار کەرکوک، ڕێبوار تەها، یا وەرپرسەیل حکومەت فیدراڵی یا حکومەت کوردستان کلکەێد، و هەرکەسیگ بتوەنێد چارەسەر ئەرا ژنەگەی پەیا بکەێد کە تویش ئی بیماریە هاتیە، کە چارەسەرەیلی گرانە، و نیەتوەنێد ئەرای بارێد، و خەڵک کەرکوکیش زانن من لە کوو نیشم، ژنەگەم چارەسەری خوازێد”.  ئی قسەیلە کەێد و ئەسر لە چەویلی رشێد.

داودە وتیش: گورانی و مۆسیقا ژیانیگە کە تەنیا ئەو کەسەیلە کە تام هونەر زانن دڵیان وەپی خوەشە، لە کەرکوک وە چوار زوان و شیوەزار چڕم، لەلییان مەقام کورد، کە لە فرەیگ لە گورانییە مۆدێرنەیل لەوەر ئاسانکارییەگەیەو وەکار تیەێد  و ناسکی و سووز و پەژارە   چوودە ناو دڵ، ئەراوە لەی سەردەمە باوە، ناو مەقام کورد لە بنەچەی خوەیەو هاتگە، کە میژووەگەی ئەرا کوردستان چوود، وە عراقیشەو.

 داودە ئویشێد : ئامرازەیل کارکردنم بریتین لە دهوڵ بازنەیی، کە پارچەیگ ناسکە لە چەرم پەس، کە لە شیوەی بازنەییە، وەگەرد گووچانیگ بویچگ کە وەپی  دەیمن لە دهوڵ، ئیجا کەسیگ تیەێد شابازانە دەێد، منیش پویل شابازانە خەمە ناو ئی کیسە. 

 داودە لە کۆتایی قسەیلی وتیش؛ بەشداری لە دەیان فێستیڤاڵ لە پارێزگایل عراق و شارەیل کوردستان کردمە و لە دویادویای ژیانم مووچە و دەسمیەتی هویچ لایەنیگ نەیرم و ژنەگەم بیمارە و تەقەلای چارەسەرکردنی دەم، بەڵام فەلەک زووردارە، پویلیگ نەیرم بەس گرانیی کەرەستەی چارەسەری شێرپەنجە بکەێد”. ، سوپاسدان کەم.”

 یەکیگ لە هاوڕیلی وەناو سەڵاح ئەحمەد ئەرا ئاژانس شەفەق نیوز وت: داودە گورانیچڕ و فۆلکلۆرناسە لە شار کەرکوک ئاوازدانان و گورانی پڕێد و ئامێرە فۆلکلۆرییە ڕەسەنەیل ژنەێد، کە رەسێدە  دڵ وەرجە گووش، داوا لە حکومەت ناوەند و وەزیر رووشنهویری و بەڕێزەیل لە حکومەت هەرێم کوردستان و وەزیر رووشنهویریی کەیمن، گرنگیدان  وە خزمەتەیلی بیەن، و دەسیگ بینەوەر لە دەسمیەتیدانی تا چشتیگ ئەرا ژنەگەی بکەێد و دڵنیابوین لەوە کە سەربەرزی خوەی جویر کەسیگ عراقی بیلێد لە ژیانیگ شایستە لە کۆتایی ژیانی، کە فایق داودە دوو ساڵ وەرجەیە خەڵات سەلاح داودە وەپی دریا، وەگەرد رێزلینانەیل ترەک.

جی باسە کە گورانیچڕ رەحمەتی سەلاح داودە خاڵو هونەرمەنەگەس، کە فرەی بەشدارییەیل خوەی لە خزمەتکردن هونەر کوردی و وەتایبەتی مەقامە کوردییەیل داگە و تا رووژ مردنی لە ٨ ئایار ٢٠٠٩ وە دەسپاکی خوەی ناسریا.