شەفەق نیوز/ خیزان ژنیگ کووچبەر کورد لە پۆڵەندا مردگە، داوای گلەوداین تەرم دۊیەتیان ئەرا هەرێم کوردستان کرد تا لەیرا بنرێەێدە خاک. 

ریباز وەرمیلی ئاموزای ژنەگە ک لەورا مردگە و ناوی ئەڤین عیرفانە، ئەرا ئاژانس شەفەق نیوز وت: ئاموزاگەی دووگیانی پەنج مانگ بۊی و لەناو یەکیگ لە خەسەخانەیل پۆلەندا مردگە. 

وتیش: ژنەگە وەگەرد شۊیەگەی و پەنج مناڵ وەرجە دوو مانگ بڕیار دان وەرەو یەکیگ لە دەوڵەتەیل ئەوروپا لەڕی بیلاروسیا کووچ بکەن، و دیاری کرد ک لەڕی ناوبەین بیلاروسیا و پۆڵەندا وەگەرد کووچبەرەیلیگ تر زیان فرەیگ لە سەردی و ورسگی و مەینەتی وەخوەیان دینە.  

وەرمیلی داوا لە حکومەت عراق و حکومەت هەرێم کوردستان کرد تەرم ئەڤین عیرفان ئەرا شار زاخۆ بارێدەو.