شەفەق نیوز- هەولێر
نەجیب غەزبان، راویژکار باڵای وەزیر دەیشت سووریا، ئاشکرا کرد کە وڵاتەگەی خوازیارە ئاسووەیل هاوکاری و هەماهەنگی وەرد عراق و هەرێم کوردستان فراوانەو بکەێد، وە تایبەت لە دۆسیەی گلەوداین پەنابەرەیل، وە دەسنشانکردن ئەوەگ سووریای نوو پەڕەیگ نوو لە سیاسەتەیلی وەرانوەر پێکهاتە ناوخۆییەیل و دەوڵەتە هاوسایەیل واز کردگە.
غەزبان، ئەرا ئاژانس شەفەق نیوز لە پەراویز بەشداریکردنی لە کارەیل "دیدار مێری" کە لە شار هەولێر بەسیاس، وت کە "سووریای نوو ئاڵشتکارییگ گشتگیر لە سیستەم و سیاسەتەیلی وەرانەور گشت پێکهاتە ناوخۆییەیل و هەرلیوا دەوڵەتە هاوسایەیل وەخوەیەو دیە"، وە رووشنەوکردن ئەوەگ وڵاتەگەی "ئمڕوو تەمای هاوکاری و دەسمیەتی فرەتر دیرێد، وە تایبەت کە چەوەری گامەیل نووە دۊای دەرچگنی لە ژیر سزایەیل ئەنجوومەن ئاسایش و وڵاتە یەکگرتگەیل".
وتیش کە وڵاتەگەی "هێمان رویوەڕوی گرفتەیل گەورایگ بوودەو کە پەیوەندی وە دۆسیەیل ئاوەدانکردن، و رەوش دارایی، و گلەوداین پەنابەرەیل دیرن، ئەو کارە کە خوازیار یەکگردن تەقەلای گشت لایەگە، و لە نوایانەو هاوسای عراقی".
و لەباوەت رۆڵ هەرێم کوردستان لە هەماهەنگیکردن وەرد هیزە کوردستانی و کوردییەیل لەناو سووریا، غەزبان سوپاسگوزاری خوەی ئەرا سەرۆک هەرێم نێچیرڤان بارزانی پیشکەش کرد، وە پەسەنکردن "دیدە گەشبین و فرە هاندەرەگەی ئەرا سووریای نوو".
دیاری کرد کە "هەرێم کوردستان پیشوازی لە شمارەیگ فرە گەورا لە پەنابەرەیل سووری کرد و شوین وەپییان دا وە دریژایی ساڵەیل جەنگ گوزەشتە"، وە دەسنشانکردن ئەوەگ لە خود وەخت کە شمارەیگ گەورا لە ئاوارەیل هانە ناو سووریا کە لە رەوشیگ سەخت گوزەران کەن.
غەزبان دووپات کرد کە "هاوکاری و هەماهەنگی وەرد هەرێم کوردستان گرنگییگ گەورا ئەرا دیمەشق دیرێد، چۊنکە ئیمە نووڕیمنە ئی پەیوەندییە وەپی ئەوەگ دەروازەیگە ئەرا وەهیزکردن و فراوانکردن پەیوەندییە دووانیەیل لە ناوەین عراق و سووریا وە شیوەیگ گشتی".
لە چوارچیوەیگ پەیوەندیدار، راویژکار باڵای وەزیر دەیشت سووریا ئاشکرا کرد لە بۊین پلانیگ ئەرا فراوانکردن پەیوەندییە دیپلۆماسییەیل لەڕی توانای وازکردن باڵیۆزخانەیگ نوو ئەرا سووریا و کونسوڵخانەیل لەو شارەیلە کە هەوەجە وە بۊینیان بوود، وەلی وتیش کە "کێشە داراییە گەورایەیل و دووارە رێکخستن سیستەم سیاسی لە وڵاتەگە خوازیاییگ مسۆگەر و کارە لەپیشینەیلیگ لەی قۆناغ ئیسە نیارین".
غەزبان رەسیە ئەوەگ، کە سووریا تەنیا هەوەجەی وە دەسمیەتی سیاسی نییە، بەڵکم ئمڕوو خاوەن "دەرفەتەیل هومیدبەخش و گەورایگە لە بوارەیل ئابووری و بەرهەمهاوردن و ئاوەدانکردن"، وە نیشانداین ئومید وڵاتەگەی ئەرا سوودوەرگردن لە شارەزاییە کردارییەیل و کومپانیایەیل لە هەرێم کوردستان، وە مدوو "شوین دەس دیارەگەی و ئەزموونە سەرکەفتگەگەی لە وەرەونواچگن و ئاوەدانکردن هەرێم".