شەفەق نیوز - دیمەشق

خیزانەیل کورد کە گلەو خواردنە ئەرا ماڵەیل و ئاواییەیلیان لە ناوچەی گرێ سپی (تل ئەبیەز) لە باکوور سوریا، رووژ دووشەممە، تویش دەسدریژییەیل هاتن لەلایەن گرووپەیلیگ کە تاکەیلیان سەروە باڵە چەکدارەیلن، وەپەی وتەی یەکیگ لە گلەوخواردگەیل، کە وت ئەوانە دەس نانەسە بان ماڵەیل وە دەسپیچگ پەیوەندیدار بۊن خاوەنەیلیان وە هێزەیل سوریای دیموکرات.

 یەکیگ لە گلەوخواردگەیل ئەرا ئاژانس شەفەق نیوز وت، کە خیزانەیل وەرجە یە هەماهەنگی وەرد حکومەت و ئیدارەی ناوچەی گرێ سپی و هێزە ئەمنییەیل کردنە، و ئەو بەڵگەنامەیلە دەرهاوردنە کە خاوەنداریەتییان ئەرا زەوی و ماڵەیل چەسپنێد، وەرجە رێککەفتن لەبان گلەوخواردن ئەرا ناویان ئمڕوو.

وتیش، کە نزیکەی 50 خیزان شەوەکی رویکردنە گرێ سپی و دەوروبەری، وە دووپاتکردن ئەوە کە ئەوانە لە دانیشتگەیل رەسەن ناوچەگەن، و گرووپەگە هیچ خیزانیگ ئەرا چەکدارەیل هێزەیل سوریای دیموکرات لەناوی نییە.

 دەسنشان ئەرا ئەوە کرد کە گلەوخواردگەیل تویش دەسدریژی هاتن لەلایەن کەسەیلیگ کە لە ناوڕاس شار گرێ سپی گردەو بۊنە، ئەوەگ هیشت  خیزانەیل خوەیان بپارێزن لەناو بارەگای ئیدارەی ناوچەگە.

 وەپەی هاووڵاتییەگە، کە داوا کرد ناسنامەی ئاشکرا نەکریەێد لەوەر هوکارەیل ئەمنی، ماشینەیل گلەوخواردگەیل تویش دزی و سزانن هاتنە، و شمارەیگ لە پیاوەیل و ژنەیل تویش پەلامار هاتن.

و داوا لە لایەنە حکومییەیل کرد هێزەیل و پشتیوانییەیل ئەمنی کل بکەن و خیزانەیل لە ناوچەگە درارن، وە رووشنکردن ئەوە کە دەیان ژن و مناڵ هێمان لەناو بینای ئیدارەی ناوچەگە گیر کردنە، لەناو وەردەوامبۊن ئاڵووزی لە شارەگە.

 لە ئاب / ئۆگۆستۆس گوزەشتە، خیزانەیل ئاوارەی کوردی لە سەرێ کانی (رەئس ئەلعەین) تویش دەسدریژییگ هاتن دۊای گلەوخواردنیان ئەرا ماڵەیلیان لە شارەگە، لە وەختیگ لەو وەختەو گلەوخواردن ئاوارە کوردەیل ئەرا ناوی وسیا، و پرۆسەیل گلەوخواردن کوڵەو بۊ لەبان کۆچپیکریاگەیل ئەرا ئاواییەیل دەورگرد شارەگە.

 لە ساڵ 2019، تورکیا و باڵەیل ئۆپۆزسیۆن سووری پرۆسەی "کانی ئاشتی" (نەبع سەلام) لە هەردوگ ناوچەی سەرێ کانی (رەئس ئەلعەین) و گرێ سپی (تل ئەبیەز) جیوەجی کردن، ئەوەگ بۊە هوکار ئاوارەبۊن نزیکەی 300 هەزار مەدەنی لە سەرەتای پەلامارەگە، لە وەختیگ دۊاتر نزیکەی 100 هەزار ئاوارە لە ئۆردوگایەیل و ناوەندەیل داڵدەداین کاتی مەننەو، کە فرەیان کوردن.