شەفەق نیوز/ وەڕێەوبەرایەتی پۆلیس پارێزگای سلێمانی، ئمڕوو جومعە، خەوەردا مەفرەزەیل پۆلیس "رزگاری" پەنج کەس دەسگیر کردنە ک سێیان لەلیان ژنن وە تاوان ساختەکاری و جادوکردن و نوشتە نۊسین لە چەن گەرەکیگ شارەگە.  

وەڕێەوبەرایەتیەگە ئمڕوو لە بەیاننامیگ وت، " دۊای گردەوکردن زانیاریل، چەودێری کردن بڕیگ کەس لە چەن گەرەکیگ سلێمانی ک هەڵسیان وە کارەیل تاڵەگردن و نوشتەنۊسین و خەڵەتانن هاوڵاتیەیل، لە دۊای دەرچگن بڕیار وە لایەن دادوەری، مەفرەزەیل پۆلیس "رزگاری" توەنستنە لە چەن هەڵمەتیگ پەنج کەس دەسگیر بکەن ک ئی کارەیلە ئەنجام دانە".  

وەگورەی بەیاننامەگە لە مەوقەی دەسگیرکردن تاوانبارەیل دەسنریا وەبان چەن پارچەیگ لە کەرەستەیلە ک لەوەخت کارەیل خەڵەتانن و نۊسین نوشتە وەکاری هاوردنە.  

لە بەیاننامەگە دیاری کرد، ئرینگە ھەریەک لەتۆمەتبارەیل (ب، ع، غ لەداڵگبۊ 1966  - پ، ر، أ لەداڵگبۊ 1973  - ن، س، أ - ح، ح، ع لەداڵگبۊ 1947 - غ، ب، ع لەداڵگبۊ 1956) وەبڕیار  دادوەر گیریانە و لێکۆڵینەوە وەگەردیان وەردەوامە.